Aizawl : May 23, 2023 atang khan Tuichangral North Group YMA chuan an huam chhunga khaw pariata High sikul leh higher secondary sikul awmnaah zirlaite tana Career Guidance Programme an buatsaih chu zirtawpni khan an zo fel.
Tuichangral North Group YMA hian Biate, Sialhawk, Tlangpui, Khawhai, Lungtan, Chalrang, Vangtlang leh Riangtleiah te Career Guidance Programme an buatsaihah hian resource person atan C. Lalhriatpuia, Bethlehem Veng, Aizawl an hmang.
C Lalhriatpuia hian zirlaite chu mahni tuizawng, mahni chakna leh chak lohna chiang taka zir a, chumi mila subject lak tur leh hnathawh tur thlang thiam turin a fuih a. Mizoramah Vailen vawi 3-na a thleng mek tih sawiin, All India Service leh Central Service dangah Mizo kan luh tlem tak em avangin officer lian tam zawk hnamdang an ni chho mek a. Mizoramah, Mizo sorkar hnuaiah ngei hnamdang officer rualin min awp mek avangin, zirlai thluak tha leh taima zualte chu UPSC leh SSC hnuaia exam buatsaih hrang hranga tling thei tura inbuatsaih turin a chah.
C. Lalhriatpuia hian service pawimawh leh sorkar hna dang thawh tumte leh thiamna sang tak mamawh hna thawh tumte tan lo chuan pawl 12 pass hnua Professional Course zir vat a tha tih sawiin, Mizoram a hnamdangin an thawh thin hna tam tak construction work hrang hrangte hi eizawnna tlak vek a nih thu leh management zirna lam bawh uar turte, hna hniam deuh zawk ni a ngaihte pawh hnualsuat lo turin zirlaite fuihin, “Eng line-ah pawh chhawr tlak nun leh thiamna bik neih a pawimawh ber” a ti.