Manipur-a Imphal East district-ah ralthuam nena buaina siam tum ni ngeia hriat mi pathum man an ni a, an kut atang hian hmanrua pawh hmuh a ni.
Heng mite hi Army-in Mobile Vehicle Check Post (MVCP) an siam hmun hrang hranga pakhatah man an ni tih Indian Army thuchhuah chuan a tar lang.
MVCP pakhatah passenger car rinhlelhawm tak, mi pali chuanna chu Pathianni zan khan an nang fuh a. An tihdina car atanga an chhuk rualin tlan chhiat an tum a; mahse, man hman an ni.
“A hun taka sipaite chetna avangin thil tha lo thleng thei dan a ni,” tiin defence thupuangtu chuan a sawi.
An kut atang hian INSAS Rifle leh a magazine, 5.56 mm silai mu 66, Chinese hand grenade leh detonator pakhat an man a. Anmahni nen hian police hnenah an hlan.
Manipur hi buaina a chhuah hnuah Union Home Minister Amit Shah chuan Thawhtanni tlai atang khan ni thum châmin a tlawh dawn a, venhimna pawh tihkhauh lehzual a ni a. District thenkhatah hel leh sipai inkahna a thleng zauh zauh bawk.
Chief Minister N Biren Singh leh Union Minister of State for Home Nityanand Rai chuan Thawhtanni khan venhimna dinhmun an thlir dun bawk.
Shah hian a châm chhungin mi hrang hrang a kawm dawn a, Civil Society Organisation (CSO) te leh inhmu thiam lote pawh a kawm ang a, boruak a pangngai leh theih dan tur a sawipui ang.
Army, central paramilitary, Manipur Police commando, Rapid Action Force of Manipur leh police dangten Imphal phai kuam leh a chhehvelah buaina siam tumte lakah beihpui an la thlak mek zel bawk tih thuneituten an sawi.
Shah hian Meitei leh Kuki te chu muanna vawng hram hram turin a ngen.
Army Chief General Manoj Pande chuan Inrinni khan Manipur tlawhin dan leh thupek kenkawhna a enpui tawh bawk.
Pathiannia buaina chhuak tharah police pakhat telin mi panga an thi a, mi dang 12-in hliam an tuar bawk a, chi leh chi inkara buaina chhuak avang hian mi 80 vel an thi tawh.
Chief Minister N Biren Singh chuan Pathianni vek khan ‘mi firfiak 40 vel’ thah an nih thu a sawi bawk.
“Mi firfiakte hian M-16 leh AK-47 assault rifle leh sniper silai hmangin civil mite an bei a. Khuaah lutin chenna in an hal a. An lakah sipai leh venhim hna thawktu dangte nen na takin kan che a. Hriat theih chinah mi firfiak 40 vel kah hlum tawh an ni,” tiin thuthar lakhawmtute hnenah a sawi.