Aizawl: MPCC President Lalsawta chuan ZPM-in kalphung thar an sawi fo chu ‘a sawia sawi aiin a taka tih a pawimawh zawk’ thu a sawi.
Khawlailung Community Hall-a Hrangturzo West Block Congress Conference nimina a hmanpuinaah Lalsawta hian Congress-in kalphung thar an tih chu an president, Lal Thanhawla’n ‘president ni ve tawh rawh se’ a tih avanga khawi daikil kara mi nge tih pawh an hriat loh kha president a rawn ni ve ngawt a. Hruaitu thain hruaitu tha dang a chher chhuak thin a, inthlak danglamna a lo thleng ta tih a sawi.
Ni tin an tawngtainaah, ‘I ram lo thleng rawh se’ tih an chham thin tih sawiin Lalsawta chuan, “Mizoramah hian Pathian ram tak tak a lo thleng em? Pathianin ram tha min pe a, mihring tha min pe bawk a. Mipuiin kan nghah mek chu sorkar tha a ni,” tiin chu sorkar tha pe turin kawng dik an kawhhmuh a, Congress party-ah kal zel turin mipui a sawm.
Lalsawta hian kum 2023 MLA inthlanpuiah party dangte nen an intlansiak dawn tih sawiin, “Sorkarna siam kan tum a, sorkar satliah ni lovin sorkar tha siam ngei kan tum a. Candidate hausa ringawt kan thlang dawn lo va, mi dik leh mi rinawm, ram leh hnam tana a tha ber ber kan rawn vawrh chhuak dawn,” a ti a; campaign-na tura Rs. nuai 200, nuai 300 nei tawh intiho chu lo tibeidawnga kumin hi a bul tanna atana hmang a sum hmanga vote lei tumte lo tizak tura ngenin, “Hetiang mihring hi Mizoramin a mamawh lo a ni,” a ti.
Hrangturzo West Block Congress Conference-a kalkhawmte hian MPCC President Lalsawta’n party a kaihhruai dan chu tha an tih thu leh an rintawk thu te, Mizoram tana a hmathlir hi Congress party tan chauh ni lo, Mizoram tana tha, hmasawnna thlen thei tur leh dinchhuahpui tham niah an ngaih avangin sokar tha siam tura Lalsawta kaihhruaina hnuaia lungrual taka theihtawp chhuaha hmalak zel an tum thu leh, kum 2023 MLA general election lo awm turah Hrangturzo biala ding tur party hotuten an dah apiang lawm takin an pawm thu leh an tlin ngei theih nan theihtawp an chhuah tur thu resolution an siam a ni.