Aizawl: ZPM thalai hruaituten nimin khan MINECO-a Secretariat Building 3rd floor-a ceiling chim chu an en fiah a, ceiling chhia chu a rang thei ang bera siam tha thuai turin sorkar an phut.
Hemi chungchanga thuchhuah an siamah ZPM thalai chuan Secretariat Building hi a sak tha tawk lo hle a, hetia a ceiling a chim chhan hi a chung atanga tui a luh nasat vang nia a lan thu an sawi a, building chung hi siam that a nih vat loh chuan lirnghing na vak lovah pawh a him tawk lo hle a, building ceiling hi siam that a nih vat loh chuan chhiatna nasa zawk a thleng thei reng a ni tih an hmuh chhuah thute an sawi.
ZPM thalai chuan building luah mektute himna tur chu ngaihtuah a tul thu sawiin, a rang thei ang berin he building hi fur ruah a tlak tak tak hmaa siam tha tura sorkar an ngen thute an sawi.
ZPM thalai thuchhuahin a tar lan danin he building ceiling chim hi department thenkhat leh Commerce & Industries Department ten an luah mek lai a ni.