Barcelona in kumina an muala an inkhel hnuhnung ber ni turah hnehna an chang a. Awlsam angreng takin 3-0 in RCD Mallorca an hneh.
Pathianni zana inkhelah hian Barcelona in goal khung turin second 49 bak an mamawh lo. Gavi ball pawhlet chu tunhnaia forward sawi hlawh Ansu Fati chuan goal-ah a khung.
Barca tana inkhel ti awlsam turin Mallorca winger Amath Ndiaye chuan hlauhawm taka Alejandro Balde a tlawh avangin minute 14-naah hnawhchhuah a ni.
Minute 24-naah Fati bawkin striker Robert Lewandowski ball siamsak chu a khung leh a. Second half-ah Gavi chuan an goal thumna a khung.
Blaugrana hian kum 2024 November thleng Camp Nou-ah home match an khel thei dawn lova. An stadium hi chei that a nih chhungin Barcelona khawpui chhungah tho Montjuic a Olympic Stadium-ah an inkhel thin ang.
Kum 2024-25 season-ah Camp Nou-ah hian an kir leh dawn chauh a, hetah hian inkhel entu pawh a hmunah a zahve bak an awm thei rih dawn lova, 2025-26 season-ah chauh stadium chei that hi an zo fel thei dawn.