- Ruata
MG Motor India chuan an premium SUV, Gloster, Blackstorm edition chu Rs. nuai 40.3 man (ex-showroom) atanga intanin an tlangzarh. He SUV thar hi a khawl lamah a chhuak mek nen a danglam lo a, pawn lam leh chhung lam zawng zawngah company danga black edition/theme kan lo hmuh tawh thin ang thoin rawng dum theme a awm thung a ni.
MG hi Mizoramah pawh an mikhual tawh lo a. An lirthei thenkhat pawh hmuhtur a awm tawh a. Hetiang SUV puitling leh changkang ho huang hi a man a to na a Mizoramah hian nei an tam ta hle a, hei aia to fe man te pawh hmuh tur a awm nawlh nawlh tawh a. Toyota in dealership mumal takin an rawn din a, hetah pawh hian hetiang huang lirthei Fortuner te bakah a man rualpui ho Hilux te a awm bawk a. Mizoramah hian nuai 40, 50 man lirthei a awm hnem tawh viau a, chuvang chuan he MG SUV chhuak mek Gloster-a a edition thar, Blackstorm Edition pawh hi Mizorama lirthei leitute tan pawh chanchin thar duhawm tak a ni awm e.
MG Gloster Blackstorm edition
MG Gloster chhuak mek nena khiakhinin a rawng leh a theme rawng dum tih loh chu danglamna liantham a awm lo kan tih tawh kha hei pawh hi a lenzawng lamah chuan a sei zawng chu 4,985mm, a zau zawng 1,926mm leh a san zawng chu 1,867mm a ni a. Rawng dum theme lirthei hi company hrang hrangah kan hmu tawh a, MG in an rawn nei ve a ni mai a. Company dangah pawh Tata Motors ‘Dark Edition’, Maruti Suzuki’s ‘Black Edition’ leh Volkswagen’s ‘Deep Black Pearl’ te bakah lirthei company hrang hrangah pawh kan hmu a ni.
Gloster Blackstorm hi rawng chi hnih – Metal Black leh Metal Ash te duhthlan tur a awm a, hei bakah hian roof rails, tail-lamp leh headlamp housing, window trim leh fog lamp housing atan black elements hman a ni a. Alloy wheel-ah pawh Blackstorm treatment kan hmu bawk a ni.
Black treatment a hmuh bakah hian pawn lamah pawh rawng sena chei (red accent) chu headlamp, brake caliper, hma leh hnung bumper-ah te leh wing mirror-ah te kan hmu bawk a ni.
A chhung leh kentel hrang hrang
A chhung lamah hian black leh red treatment kan hmu a, interior upholstery chu all-black a ni a, steering leh dashboard-ah red accent (rawng sena cheina) a awm a. Gloster Blackstorm edition hian Gloster pangngai, chhuak mekin a neih ang zawng zawng chu a nei ve vek a. Heng zingah hian 12-way adjustable driver’s seat, 8-way adjustable passenger’s seat, dual panoramic sunroof leh Gloster model danga awm advanced driver-assistance systems (ADAS) chu awmin hemi hnuaiah hian himna hmanraw eng emaw zat a awm a, lane change assist leh adaptive cruise control te pawh a tel a ni.
A khawl
MG Gloster Blackstorm edition hian Gloster pangngaia kan hmuh ang chiah a hman chhunzawm zel a, 2WD version hian 163hp power pechhuak thei, 2.0-litre turbo-diesel engine a hmang a. 4WD variant hian 218hp power pechhuak thei 2.0-litre twin turbo-diesel engine a hmang thung a. Heng engine pahnih hi 8-speed gearbox nen an inkawp a, mahse 4WD hian BorgWarner transfer case neiin shift-on-fly system a nei a ni.