Burma rama rapper lar pakhat chu kawlphetha chhe lutuk vanga a thinrim puakchhuakin sipai sorkar na taka a sawisel hnu-ah man a ni.
Facebook video kaltlanga a thinrim ang chiam mai hi mi tam takin an hmu a, Byu Har inhrikthlakna hi an share nasa hle. Rampuma kawlphetha mumal lo leh tha lo lutuk vanga thuneitu lu ber thlengin tawngkam na tak tak hmaning a sawisel.
Sipai hotulu ber Min Aung Hlaing na taka a beihna karah Aung San Su Suu Kyi kaihhruaina hnuaia an awm laia kawlphetha hniarhnang tak an neih dan te nen lama a khaikhin, thinrim engphiarin a tawngchhuak.
Hemi hnu darkar tam vak lovah ramchhunga remna leh muanna tiderthawngtu-ah puhin, police-in an man zui a, tunah hian hren mekin a awm.
Byu Har hi Burma rama hlaphuahthiam lar Naing Myanmar-a fapa niin, a pa hla siam, ‘Kabar Ma Kyay Buu’ phei chu February 2021-a sipaiin civil sorkar kut atanga thuneihna a chhuhsak vuakvetah khan rampum huap anga sak leh play hlawh ber a ni.