Nakkum lamah a khelh hun sawn leh ta rih mah se Asia khawmualpui huap football tournament lian ber chungchang hi thli tho teh ang.
2023 AFC Asian Cup hi a tum 18-na tur niin, kum li dana Asia khawmualpui huap mipa football-a ram leh ram inelna (quadrennial international men’s football championship of Asia) niin, Asian Football Confede-ration (AFC) huaihawt a ni.
Kum 2019-a khel thei tur team ram 24-a an tihpun tak avangin tuntum pawh hian heti zat Asia khawmualpui ramte hian Qatar ram khawpui palia stadium pariatah champion nih an inchuh ang a; a thlengtu ram chu defending champion an ni.
He tournament hi a tirah chuan kumin June ni 16 atanga July ni 16 chhung hian China rama khelh tura ruahman a ni a, mahse, nikum May ni 14 khan AFC chuan Covid-19 pandemic leh China Zero-Covid policy avangin China rama nghah a nih loh tur thu puangin, nikum October thla a herchhuah meuh chuan AFC lamin tournament thlengtu thar an puang thei ta a, Qatar thlen tura dah niin, hlawhtling taka Fifa World Cup pawh thleng thei ram hi Asian Cup tum thum thleng thei hmasaber an ni dawn a, kum 1988 leh 2011 khan he Arab thlaler ramah hian nghah a lo ni tawh.
Persian Gulf rama nipui sensa lutuk leh 2023 CONCACAF Gold Cup-a Qatar an chhuah dawn bawk si avangin kumina Asian Cup khelh tur pawh chu nakkum atan an sawn a, kum 2024 January ni 12 atanga February ni 10 chhungin ram 24-in trophy thar an inchuh ang a, tuntum AFC Asian Cup-ah hian prize money-ah US dollar maktaduai 15 zet semral a ni dawn.
Fifa ranking thar bera 101-na luahtu India chu AFC Asian Cup-ah hian a tum ngana atan a inlan ve leh dawn a, an aia ranking nei sang thiau pathum – Australia (ranked 29th), Uzbekistan (74th) leh Syria (90th)-te nen Group B lamah an awmho dawn a, Blue Tigers tan group stage paltlang ngawt pawh huphurhawm tak a nih hmel!
Tunhnai Qatar Opera House-a tournament official draw ceremony kha AIFF president Kalyan Chaubey bakah senior men’s national team head coach Igor Stimac leh women’s national coach Maymol Rocky-te’n a hmunah an chhim ve nghe nghe.
India hian an group match hmasaberah kumthar January ni 13 khian Ahmad Bin Ali Stadium-ah Australia tumin, he khelmualah vek hian January ni 18-ah Uzbekistan an su zui leh ang a; Syria nena an group stage game hnuhnung ber erawh Ahmad Bin Ali Stadium lamah ni ve thungin, a hun hi January ni 23 a ni.