Union Home Minister Amit Shah chuan tun hnaia chi leh chi inkara tharum thawhna a thlenna, Manipur a tlawh mek a, hetih mek lai hian sorkar laipui chuan buaina chhuaka thite chu zangnadawmna Rs. nuai 10 zet an chhungte pek an ni dawn tih a puang.
Shah hi Thawhtanni tlaiah thlengin Thawhlehni khan buaina chhuahna hmun ber, Churachandpur district a tlawh zui a, hetah hian tribal nuhovin hnam puanzar nen an lo hmuak a. “Sorkar laipui chauhvin min ching fel thei,” tih inziahna poster an lo tar bawk.
Home minister hian a hmain Imphal-ah mi pawimawh tak tak, Chief Minister N Biren Singh leh sorkar hotu liante a hmu tawh bawk.
“Heng mite hian muanna a awm theih nan theihtawp an chhuah a, Manipur-a nunphung a pangngai leh theih nana an thawh dante pawh an sawi,” tiin home ministry thuchhuah chuan a tar lang.
Imphal-ah hian Chief Minister’s Secretariat-ah ngun zawka sawiho niin pawl leh mi hrang hrangin an state-a muanna a awm leh theihna turin hma lak tha an ti a. Sorkar laipui hian telephone line pawh BSNL puihnain ‘thu dik lo vawrh darh a nih loh nan’ thlun a nih tur thu a puang bawk.
Thla khat chuang liam taah khan reserve forest huam chhunga Kuki khuaa awmte chu hnawh chhuah tum an nih avangin buaina a chhuak a. He thil thleng hi duh lohna hrang hrang lantir a ni a, boruak a inmung zel a, politics thila inbeihna pawh a tam phah.
Hetiang karah hian May 3 khan tribal pawl hrang hrangte chuan Meitei-ten Scheduled Tribe (ST) status neih an phut duh lohna lantirin kawngzawh puitham tak an huaihawt a, heta tang hian tharum thawhna nasa zawk a thleng zui ta a ni.
Thawhlehniah vek hian Congress party aiawhte chuan an president, Mallikarjun Kharge-a hovin Delhi-ah President Droupadi Murmu chu a chenna, Rashtrapati Bhavan-ah an hmu a, Manipur-a thil thleng chhui an phut thu an thlen.
Congress party hian commission chu Supreme Coust-a judge tang lai emaw, a chawl tawhin emaw ho ngei se an duh thu president hnena memorandum an thehluhah hian an tar lang.
Thawhlehniah vek khan Chief of Defence Staff General Anil Chauhan chuan Manipur-a thil ching fel tur hian hun a la duh deuh dawn niin a sawi bawk a. Buaina hi chi hnih inkara chhuak a ni a, sipai chakna hmanga a tu ve ve mah beih let a remchang lo niin a sawi.
“Sipai chakna hmanga thil tih theih a ni lo va, chi hnih inkar thil a ni a. Dan leh thupek kenkawhnaah erawh state sorkar hi kan pui thei reng,” tiin General Chauhan chuan a sawi.
“Hna ropui tak thawkin nunna tam tak kan chhan a. Manipur buaina hi a la reh mai lo va, hun a la duh ang; mahse, boruak a pangngai leh erawh a beiseiawm,” a ti bawk.