New Delhi-a sorkar laipui dawra zin, Chief Minister Zoramthanga chu nimin khan Mizoramah a let leh a, amah hmuaktute hmaah thu sawiin sorkar laipui hotute a dawrnain Mizoram tan hmasawnna leh rahbi thar tam tak a hmuh ngei a rin thu a sawi.
Chief Minister Zorama chuan a zin chhungin prime minister, finance minister, union home minister, DoNER minister leh minister dang a hmuh thu sawiin, sorkar laipui hotute hnenah chuan Bangladesh, Myanmar leh Manipur raltlante tana thahnemngai taka a thlen thu a sawi a; heng an indawrna atang hian Mizoram tan hmasawnna leh rahbi thar tam tak an hmuh leh ngei a rin thu a sawi a ni.
Zorama hi May 27-a New Delhi-a NITI Aayog Governing Council neihah a tel a, May 28-a India Parliament building thar hawnna inkhawmah a tel bawk a, nimin chhun khan Lengpui Airport thlengin MNF Aizawl East I South Block hruaituten an lo hmuak a ni.