Mizoram sorkarin Manipur atanga Mizorama tlan lutte chhawmdawlna tur sum sorkar laipui hnenah a dil.
The Zozam Times zawhna chhangin Home Commissioner H Lalengmawia chuan Manipur raltlante chhawmdawlna tur hian Ministry of Home Affairs-ah Rs. vaibelchhe 5 dil a nih thu sawiin, “Chief Minister Pu Zoramthanga DO letter hmangin dilna hi thlen a ni,” a ti.
Home commissioner chuan tuna an mamawh zualpui phuhrukna turin Rs. vaibelchhe 5 dil phawt a nih thu leh an hmuh ngei pawh an beisei tih a sawi a; a bak dang chu a tul dan azirin la bawhzui tur a nih thu a sawi.
H Lalengmawia chuan raltlante chu sorkarin a theih ang angin a chhawmdawl zel a, tun dinhmunah chuan harsatna tawk an awm lo tih leh raltlan tam zawk chu relief camp-ah an awm mek tih a sawi bawk.
Manipur khua leh tuite Mizorama an tlan luh chungchangah hian Manipur sorkarin Mizoram sorkar a la bepawp lo tih home commissioner chuan a sawi bawk a, “Manipur sorkar atangin an mite Mizorama awmte thawn kir tur emaw, ngaihsak tur emaw, hemi chungchangah eng thu mah dawn kan la nei lo,” a ti.
Mizoram sorkarin a chhinchhiah chinah nimin tlai dar 5:00 thleng khan Manipur raltlan hi 8,532 an tling tawh a, Kolasib district-ah tam berin 2,925 an awm mek a, a dawttu Aizawl district-ah 2,738 awmin, Saitual district-ah raltlan 2,257 an awm.
A bak district dang Champhai-ah 181, Lunglei-ah 64, Serchhip-ah 47, Khawzawl leh Mamit-ah 33 ve ve leh Hnahthial district chhungah te Manipur raltlan mi pali an awm mek a ni.