- Ruata
Mahindra lifestyle offroader lirthei lar Mahindra Thar chu kawngka 5 awm (5-door) model tichhuak turin Mahindra in hma an la mek a, kuminah an tlangzarh hman hmel loh a, he lirtheiah hian sunroof a awm dawn tih thuthar a awm leh tawh bawk a ni.
Mahindra Thar 5-door hi tunhnaia an enchhin lai video leh thlalak te pawh hmuh tur a awm leh ta nual mai a. Hetah hian a chunga sunroof chu a lang kalh mai a, he offroader thar tur nghahhlelhawm tak hian sunroof a nei dawn tih a tichiang a, hei hi a lei tumtu tam tak te lawmna a thlen ngei a beiseiawm a ni.
Kan hriat angin tunhnaia lirthei changkang leh tha deuhah chuan a zawng zawng chuan ni lo mahse a chung hawn theihna, sunroof hi a awm zel tawh a. Mahindra Thar 5 door-a a lo awm ve tur pawh hi Mahindra Thar tan chuan thil thar a ni dawn a, duhtu leh duh lo tu pawh tam tak a awm theih awm e.
Mahindra Thar 5-door kentel tur
Mahindra hian India rama lifestyle offroad lirthei huangah chuan nasa takin hma a hruai a, he huangah hian lirthei dang duhthlan tur hi a tam rih lo viau bawk a. Mahindra Thar 3-door chhuak mek neitutena an lei chhan ang tho chu phawk chhuak turin Mahindra hian 5-door Thar-ah pawh hian tan a la hle a ni.
A hmaa Mahindra 3-door lo ngainatute tan pawha lei chakawm tur leh an hman thinnaa hman chhunzawm zel theihah 5-door Thar hi rawn tihchhuah an tum viau a. Hei bakah hian Thar chhuak mek aiin kentel hrang hrang pawh a rawn neih ngah hret hmel a, heng a kentel tur hoah hian sunroof pawh a tel a ni.
Thar 3-door ang lo takin Mahindra hian Thar 5-door-ah hian soft-top variant a nei lo maithei a. Mahindra hian Thar 5-door-ah hian front center armrest, touchscreen infotainment system updated bakah a chhung hmunawl zau tha tak, thutna rem dan duhthlan tur hrang hrang, a hnung thutna seat hrang pahnih duhthlan tur bakah a chhung hrim hrim siamna hmanraw tha zawk te kan hmuh hmel a. Tuna Mahindra Tharin a kentel hmanraw changkang hrang hrang bakah himna hmanraw tha tak tak te chu kan hmuh zui zel hmel bawk a ni.
Nakkumah Mahindra Thar 5-door tlangzarh a ni ang
Tun hnai khan Mahindra chuan tunah hian order backlog pung zel chu tihfai kawngah an kut a phar tawh tih an puang. Thar 3-door, XUV700, Scorpio N leh Scorpio Classic te ang SUV unit nuai hnih chuang dahkhawm chu tun thla thleng hian customer-te hnenah an la thawn thei lo. Chuvangin, company chuan a hnung lamah product thar siam chhuah tam tak a awm laiin, tunah hian order awmsa thawn chhuah a ngaih pawimawh em avangin nakkumah chauh India market-ah SUV thar a rawn luhtir dawn tih a sawi chiang hle.
Tunah hian Mahindra hian an booking hmuh tawh sa semchhuah hna chu rim takin an thawk mek a. Tunah hian booking tih tawh sa Mahindra lirthei nuai 2 chuang chu an pechhuak char char a ni. Heng avang hian Mahindra hian lirthei thar tlangzarh lam an hawi thei lutuk lo a, kuminah chuan order awmsa semchhuah lamah an la ram tang rih dawn niin a lang a, hei hi an hotu lam te pawhin an sawichhuak tawh a ni.
“Mi tam takin lo sawiin kumina a chhuah hun tur an lo inrinsiak tawh na a, kan 5-door Thar hi kumin chhung hian tihchhuah a ni dawn lo. Hei hi chu kum 2024-a tlangzarh tur zinga mi a ni,” tiin Rajesh Jejurikar, executive director & CEO (Auto and Farm Sector), Mahindra and Mahindra Ltd. chuan tunhnaiah a sawi a ni. Mahindra Thar 5-door bakah hian Mahindra hian kum 2024-a tlangzarh tur XUV300 compact SUV hmel thar chu a buatsaih mek bawk a ni.