Aizawl: MSU Sub-Headquarters, Lungsen buatsaih Lungsen khuaa HSSLC pass tharte lawmpuina nimina an buatsaih chu Thorang bialtu MLA, Congress Legislature Party (CLP) Leader Zodintluanga Ralte-in a hmanpui.
Lungsen North Branch YMA Hall-ah pass thar lawmpuina inkhawmah Zodintluanga Ralte chuan thu sawiin pawl 12 pass chu zirna leh eizawnna kawnga rahbi pawimawh ber pakhat a ni a. Tun atang chuan hmun dangah lehkha zir tur an tam dawn a, mi tam takin nu leh pa hmuh phak loha an awmin nun an uluk loh avangin an nun an tihchhiat phah thin tih sawiin, “In nu leh pa leh chhungte rilru tina zawnga awm lo tur leh hlawhtlinna sang zawk nei zel tur a tan lak a pawimawh hle dawn a. Mi hlawhtlingte hi nu leh pa thuawih mai bakah taima taka bei hram hram an ni zel,” a ti.
Zodintluanga Ralte hian zirna leh thiamna hi inchhuhsak theih loh ro an neihna tur a ni tih a sawi a. Mizoramin mihring chhawr tlak chherchhuah kawngah hma a lak a tul nasa hle tih a sawi a, ram lian lo tak – Israel, Japan leh South Korea pawh mihring chhawrtlak an chherchhuah tam avanga ropui an nih thu a sawi.
Mihring chhawrtlak chu khawi hmunah pawh mi hlawhtling leh chhenfakawm an ni a, eng hna pawh thawk se dinchhuahna tur a awm nia sawiin, Mizoram chauh ni lo, India ram pum inelnaa tel phak tura chher an ni tawh a. Ngaihtuahna thui zawk sengin India rama hna sang ber berte an cho pha lo a nih pawhin hna tha leh thawhtlak thawk turin tun atang an rilru leh ngaihtuahna senga inbuatsaih turin bialtu MLA hian zirlaite a chah.
MSU Sub-Hqrs, Vice President John Vanlalhnema kaihhruai pass tharte lawmpuina inkhawmah hian MSU Regional Hqrs; Lunglei President Lallianpuia, MSU Sub-Hqrs MSU President P. Laldinpuia, Lungsen 1 VCP C. Lalremruata leh Lungsen 2 VCP R. Lalthianghlima ten thu an sawi bawk.
Tun hnai HSSLC exam result chhuakah khan Lungsen khua atangin zirlai mi 19 in HSSLC hi an pass a ni.