Aizawl: MPCC President Lalsawta chuan kum 2018-a an tlak hnu atang khan lawm viauna tur chhan an nei lo chungin, sorkar ta se sorkar tha an din dawn tih an hriat avangin nghet takin Congress tan an ding tih a sawi.
Nilainia Lal Thanhawla Auditorium-a Aizawl District Congress Committee (ADCC) huam chhung Block Leaders’ Conference neihah Lalsawta chuan rinawm taka an din ngheh tlat avangin mi tha tak tak Congress-ah an lut tawh a, an luh belh zel dawn tih a sawi a. Mi ropui leh hmingtha tak tak lut tawh leh lut mekte hian an party-a an luh duh chhan chu party policy-ah hian mipui an lal ber thin a, tun tumah pawh an lal ber dawn tih a sawi a. Mi huaisente zarah leh a chhunga mi huaisente zarah hian Mizoramah sorkar tha an siam lehna tur kawl a êng nia a hriat thu sawiin, “Huaisen taka theihtawp kan chhuah chuan kan sorkar ngei dawn a ni,” a ti.
Lalsawta chuan anni aia dinhmun tha lo ve leh chhawngte tan hna an thawk dawn a, humhim a dinchhuahtir hi an tum tih avangin inthlana pawisa chakna tihbo an tum tlat a, an tum chhan chu rethei leh zual zawkte tana thawk tur an nih vang tih a sawi a. “Ram siam that kan duh tak tak chuan he thil hi kan tih ngei a ngai a, kan hotute pawhin candidate-te tihautak lo zawnga ruahmanna kan siam a tul tak zet a ni,” a ti bawk.
Politics-a an awm chhan chu thil tha tih a ni a, thil tha an tih tam tak zingah Dr. Lal Thanhawla hoa an din, Falkawn Referral Hospital leh Tuirial Hydel Project ringawt pawh hi ropui tak a nih thu a sawi a. Congress party hian thil tha tam tak an ti tawh thin a, an thil tha tih te hi sawi uar ve pawh a tul a. Chung zawng zawng chu Congress party an lo thlan tlin thin tawh vang leh mipui zar liau liau a nih thu a sawi.
MPCC Vice President Lal Thanzara kaihruai Block Leaders’ Conference-ah hian MPCC Media Deptt Chairman Dr. Lallianchhunga’n power point presentation hmangin Congress Party Manifesto No.1 ‘Tang Puihna’ a sawi fiah a. ‘Tang Puihna’ video tawi tlangzarh a. Chawhnu lamah block tin report ngaihthlak niin manifesto chungchang zawhna leh chhanna hun hman a ni.