Aizawl South III bialtu MLA Prof. F. Lalnunmawia chuan Maubuang High School Managing Board buatsaih, HSLC pass lawmpuina hun leh Hualngohmun atanga Muallungthu Educational Staff Association (HMESA) buatsaih, HSLC pass lawmpuina hun a hmanpui.
Prof F Lalnunmawia chuan tun lai khawvelah khawtlangin zirna an ngai pawimawh a, zirtirtute kutah chauh dah lo va, khawtlang hruaitu leh nu leh paten an ngaihsak thar ta hi a hlu hle nia a hriat thu a sawi.
Zirlaite fuihin Prof. Mawitea chuan, “Zirnaah HSLC pass hi a kakpui thleng ang kan ni a. Tunah chuan nangmahni line theuhah in kal tawh dawn a. In tui zawng in hriata in kalna tur in chian a ngai hle a. In subject thlan tur pawh uluk a ngai hle a ni,” a ti a. Tun laiah pass tawng tawng hian awmzia a nei tawh lo a, hlawhtling tur chuan mite aia thawhrim a ngaih avangin HSLC an zawh atang hian an zir leh zelna turah taima zawka zir a, tun aia an tihthat chhoh an beisei dawn niin a sawi.
Lehkhabu chhiar tam hi hlawhtlin nan a pawimawh tih sawiin, “Tunlai khawvelah naupang atanga upa lam thlengin internet leh social media kan buaipui nasa ta hle a, hemi kawngah hian zirlaite insum theih a tul hle a, mahni zirlai lehkhabu chhiar tam hi hlawhtlin nan a pawimawh takzet a ni,” a ti bawk.