Indian wrestler-ten an pawl hotupa laka lungawi lohna an lantir mek thlawptu, lo neitute chuan infiam mite phut tihhlawhtlin nan June 9 thleng sorkar ngaihchan an tum.
Lo neitu pawl hruaitute chuan wrestler-te duh anga wrestling body chief Brij Bhushan Sharan Singh-a chu Zirtawpni hmaa man a nih loh chuan lian zawka lungawi lohna lantir an tum tih an sawi.
“Thutlukna siamin wrestler-te phut hi kan tawmpui a, Brij Bhushan Sharan Singh-a hi man a ni ngei tur a ni. A nih loh chuan June 9-ah hian wrestler-te tawiawmin Delhi-a Jantar Mantar kan pan ang a, ram puma khaw tinah lungawi lohna lantir a ni ang,” tiin an hruaitu, leader Rakesh Tikait chuan Zirtawpni khan a sawi.
“Wrestler-te laka thubuai ziah luh pawh sut ngei tur a ni a, Brij Bhushan Sharan Singh-a hi man ngei tur a ni,” a ti.
BJP MP Singh-a hi wrestler hmeichhiate hian an chungah mipat hmeichhiatna lam hawiin mawi lo takin a che niin an puh a. Wrestling Federation of India (WFI) chief a nihna chu hmang sualin infiam mite laka mipat hmeichhiatna rawng kaia chet phah nan a hmang niin an puh.
Sports Minister Anurag Thakur pawhin wrestler-te tan hian dikna hlenchhuah ngei a nih tur thu a sawi a; mahse, BJP MP man lam erawh a sawi lo thung.
“Sorkarin a duhsakna leh khuangrual lo taka chhuina kan duh lo va, tute pawhin dik taka tih vek kan duh a; mahse, tih dan kalphung ang zawm tur erawh a awm a ni,” tiin Thakur hian Times Network-in Ningania India Economic Conclavea huaihawt a telpuinaah a sawi.
Olympic leh world championship-a medal dawng tawh eng emaw zat pawh telin, India-a wrestler lar tak takte hian kumin kum tirah khan an pawl hotupa chet dan avanga lungawi lohna hi an lo lantir tawh a. Sorkarin chhui a tiam avang leh Singh-a pawh a nihna hmanga a tih turte ti rih lo tura tih a nih avangin an tawpsan.
Mahse, chhuina report hi tun thlengin hmuh tur a la awm lo va, Singh-a lakah pawh hmalak zuina a awm lo bawk a, April thla atang khan lungawi lohna lantirin Delhi-a hmun lun lai, Jantar Mantar-ah man leh a nihna hlihsak phutna an lantir thar leh.
Pathianni khan Prime Minister Narendra Modi-a’n India parliament building thar a hawnna lam pana kawng an zawh chu police-in lo dangin an zinga mi hren an ni a, chhuah lehnghal ni hlawm mah se buaina an siam avangin thubuai siamsak an ni.