Aizawl: Education Minister Lalchhandama Ralte chuan zirna standard tisang turin theih ang tawkin hman an la a, tuna chuan sorkar enkawl zirna inah zirlai an lut hum hum tawh tih a sawi.
He thu hi nimina MNF party-in Hnam Runa chhung inkhawm an neihah a sawi a, MNF adviser chuan a enkawl education department chungchang sawiin, “Vawiinah hian kan sikul hi en rawh u, a tha em em tawh a, tun hmaa nu leh paten kan fate sorkar sikula kaltir duh mang thin lo khan tunah chuan an kaltir ta hum hum,” a ti.
Education minister chuan zirtirtuten an awm hmun atanga internet facility-te nen zirna an pek theihna turin primary sikul zirtir turte chu tablet eng emaw zat pek turin ruahmanna scheme an siam tih leh central pawhin a rawn pe tawh tih a sawi a, khawvel changkanna mil zelin zirna an kalpui zel tih a sawi.
Minister Chhantea chuan a department chan, Labour Employment & Entrepreneurship-in Mizo thalaite tana hma an laknate sawi bawkin, Mizoram Mega Job Fair an buatsaihah mi 150-in eizawnna appoinment an hmu tawh a, British Army turin mi pahnih an tling tih a sawi a, India ram pumah skill development-ah state hmala tha award an dawn thute a sawi a. An party MNF-in an manifesto chu tihlawhtling turin hma a la a, tih hlawhtlin a nei teuh tawh tih a sawi bawk.