Paris Saint-Germain manager Christophe Galtier chuan zanin hian an star player Lionel Messi chuan Parc des Princes-ah a tawp nan a inkhel dawn tih a sawi.
Kum 35 mi Argentina forward hian tun nipuiah contract a hmang zo dawn a, a ziah belh tawh dawn loh avangin Paris khawpui a chhuahsan dawn.
Kum 2021 July a free transfer a PSG zawmtu Messi hian season hnih an hnena a cham chhungin Ligue 1 title vawi hnih a lakpui.
Galtier chuan, “Football chanchin a player tha ber coach ka ni thei. Clermont kan tum hunah Parc des Princes-ah a tawp nan a inkhel anga, mipuiin nasa taka an lo lawm ka beisei.” tiin a sawi.
Season tawp lamah Paris Saint-Germain in beisei anga season an hman loh avangin fans te lung a awi lova, an player thenkhatte bakah an coach te an sawisel thin.
Tunhnaiah PSG in Messi bakah forward Neymar, midfielder Marco Verratti leh Galtier te chenna inah venhimna an dah belh hial.
Engtin zel?
Messi hian PSG-ah tam tak beisei angin hun hmang lo mahse match 74 atangin goal 32 a khung thova. Tun season-ah inelna hrang hrangah goal 21 leh assist 20 a nei.
A inkhelh lehna tur inrinsiakna a nasa zui nghal viau a, a club hlui Barcelona chu sawizawm nimahsela an sum dinhmun in a zir loh avangin a kir thei dawn lo niin European football a chanchinbumi rintlakte chuan an sawi.
Hetihlai hian Major League Soccer leh Saudi Arabia lam atangin sawmna lian tak a dawng dawn nia sawi a ni bawk.