Kan thenawm state Manipur buai meuh chu a rapthlakin retheihnaah mipui a va hnuk lut tam dawn em. Nunna hlu tak an chan rualin mi sing telin in leh lo an chan a. Chumi nghawng chu retheihna a ni ngei dawn a, Manipur buai an tawrh dawta tuar ve tu tur chu kan ni ngei mai. Kan va tuar tlang nasa dawn em.
Manipur buaiin Mizoram a nghawng dan tur hi kan thlir lawk a ngai nasa a. Kan chief minister pawhin heng raltlante buaipuina tur central lamah a dil ta hial mai. Central hian eng ang takin nge min puih ang a hriat loh a, min nghawng dan tur hriatthiam theih a la ni mai lo.
Buaina hian kan ramah mikhual sing tel a rawn hruai lut mek a. Kan unaute an ni a, tlanchhiatna tur dang an nei lova, an unaute awmna an rawn pan a ni a. Keini pawhin theih tawpa kan lo dawnsawn a ngai reng a ni. Amaherawhchu kan ram retheihna hi kan hriat tel reng a ngai. A bul an tan ni lekin a la lang a, engtinnge kan lo enkawl dawn. A bul tannaah chuan kan la ti tha viau. Mahse, a rei hnu kan ngaihtuah a ngai a ni.
Heng mi mangangte hi ei leh barah a thlawnin kan chawm thei dawn lo chiang sa a. Ruahmanna fel a ngai. An hnathawh tur kan ruahman a ngaiin, helaia an awmchhung an awm awl lohna tur kan ngaihtuah loh chuan sualna a punlun ngei ang. A hmasa berin a mihring hriat chian hmasak hi kan tum tur a ni. Registration fel tak kan neih a ngai. Hemi chungchang hi Central YMA lam chuan an uluk viau nia a lan laiin sawrkar zawk hian a ngaihthah emaw ni chu aw a tih theih. Kan sawrkar hian Manipur atanga raltlante lo ngaihsak a, lo buaipui tur committee a din phawt a ngai. Chu committee chuan an dinhmun dik tak a vil reng a ngai a. Mi hrang hrangin tanpuina an khawn ringawt maite pawh hi kan en chian a ngai hle bawk.
Tanpuina mamawh lem lo mi hausa tak tak, mi in luaha khawsa nghal mai thei pawh tam tak an awm dawn a. Chutih rualin mirethei tam tak an awm bawk ang. Hengte hi anmahni lam buaipuitute chuan an thliar theih a ngai ang. A pawimawh ber mai chu an hausa emaw, rethei emaw, chhinchhiah fel vek hi a pawimawh ber mai.