Aizawl : Serchhip Kawlri tlanga Social Welfare Depapartment-in an buatsaih ‘Observation Home’ chu Inrinni khan Social Welfare Minister Er. Lalrinawma’n a hawng a. Eklavya Model Residential School a tlawh nghal bawk.
Social Welfare Minister chuan, Serchhip Obsevation Home hawn a ni chu lawmawm a tih rualin, hmang tangkai tur awm tam lo se a duh thu a sawi a. Obsevation Home lo awmna chhan ber chhungkaw kehchhiatna leh nupa inthenna te chu tlem deuh deuh se a duh thu a sawi.
Assistant Engineer, SW&TA, Lalthankima’n a sawi danin, Rs. 87,45,000 senga sak Serchhip Kawlri Tlanga Obsevation Home chu kum 2022 April-a sak tan, kumin April-a zawhfel a ni a. Building pahnih Main building Rs. 55,82,953 senga sak leh Superintendent office building Rs. 31,62,047 senga sakte niin, deparmental work a thawh a ni.
Director, WCD Zoramthangi Chhangte-in naupang kum 18 la tlinglo, dan kalha che mi 25 enkawl theihna tura duan a nih thu leh Observation Home hi kum 2016 atangin Serchhipah din tan a nih thu a sawi a. Mission Vatsalya hnuaiah Women & Child Development, Social Welfare & Tribal Affairs department in a enkawl a nih thu leh Principal Magistrate kaihhruaina hnuaiah Juvenile Justice Board (JJB) ten home a awm naupangte chungchang chu an ngaihtuah thin thu a sawi bawk.