Sorkarin traffic Jam tih ziaawm na tura scheme a duan Parking House Support Scheme (PAHOSS) hnuaia parking house sakna tur sum pek kim tawh mi 15-ten lirthei dahna tur an sa zo tawh a, mi 124-in an la sa mek a; he scheme hnuaiah hian sum Rs. nuai 1,000 chuang sen ral a ni tawh.
RTI hmanga zawhna UD&PA department-in a chhan danin PAHOSS hnuaia lirthei dahna tura tanpuina sum dil hi mi 1,462 awmin mi 403-te dilna pawm a ni a. Tanpuina sum pek tak erawh mi 139 an ni rih a; chung zinga mi 15-in sum an dawn tur an dawng kim tawh.
Tanpuina sum hi installment-a pek an ni a, first installment dawng tawh mi 139 an awm a, chung mite sum dawn belhkhawm chu Rs nuai 887.60 a ni a, second installment dawng tawh mi 27-te sum dawn belhkhawm chu Rs nuai 200.60 a ni a, sum dawn tur hnuhnung third installment dawng tawh mi 15-te sum dawn belhkhawm chu Rs nuai 44.01 a ni.
Sorkarin PAHOSS scheme hnuaia tanpuina dawngtute tana sum a pek chhuak tawh zawng zawng chu Rs nuai 1,132.30 a tling a ni.
Lirthei dahna hmun tur siamna sum dawng kim tawh mi 15-te parking house-a lirthei dah theih zat chu LMV 85 leh two wheeler 423 a ni a, la sa zo ve lo mi 124-te parking house-a lirthei leng tur zat chu LMV 1,594 leh two wheeler 2,806 a ni.
Sorkarin traffic jam tihziaawmna turin PAHOSS hnuaiah Rs nuai 1,000 chuang seng ral tawh mah se Aizawl khawpuiah erawh traffic jam a ziaawm phah lo thung.