Aizawl: State pawn atanga Mizorama lak luh khawnvartui rim nam nia sawi, ‘Rohu’ sangha chu a endikna hmun tur laboratory la zawn mek a ni a, khawnvartui rim a nam chhan hi hriat theih mai a la ni lo.
Health & Family Welfare department hnuaia Food & Drugs Administration (FDA) hotuten an sawi danin sanghaa khawnvartui rim a nam chhan endik turin India hmarchhak state hrang hranga laboratory-te biakpawp ni mah se enfiahna tur khawl nei an awm lo a. Kolkata-a Central Food Laboratory pawhin endikna an nei chuang lo a, anni thurawn angin Kochi-a thawn turin an bepawp leh mek.
FDA hotute chuan laboratory hrang hrang an biakte hian ‘Rohu’ sanghaah khawnvartui rim a nam hi mak an ti hle a, an thil hriat ngai loh a nih thuin an lo chhang tih an sawi a ni.
Rohu sangha hi a tam ber chu Andhra Pradesh atanga lakluh a ni a, Silchar-a sumdawngte chah luh a ni a. He sanghaah khawnvartui rim a nam thu report an dawn khan FDA hian sangha chah luttute hi an zawtfiah a, anni lam hian a ngaihna an hre lo a, sangha bawm hi an hawng ngai lo tih an sawi a ni.
Tar lan tawh thin angin ‘Rohu’ sanghaah hian khawnvartui rim a nam report an dawn avangin FDA chuan hetiang sangha hi eng emaw zat an la khawm a. Sangha zuarte pawh ‘Rohu’ hi la lut rih lo turin an ngen a ni.
Sangha helah hian khawnvartui rim a nam lo a, sangha hi kan emaw, chhum emaw a nih hnuah chiah khawnvartui rim hi a nam a. Hetianga a nih loh dan anga sangha a awm avang hian FDA chuan mipuite chu hetiang sangha hi ei loh a him thu an chah bawk a ni.