May 26-a thil thleng tawh a ni a Baran, Rajasthan-ah chuan darkar 12 chhungin tuak 2,000 chuang zet inkutsuihin Guinness World Record (GWR)-ah chhinchhiah thar an ni a, ni khata innei tam ber an ni.
Kum 2013 khan ni khat (darkar 24) chhungin Yemeni tuak 963 an lo innei tawh a, hei hi a tam ber a ni a. GWR website-a tar lan a nih dan chuan Hindu leh Muslim inneihna liantham tak huaihawt a ni.
Inneihna hi trust pakhat, Shri Mahaveer Goshala Kalyan Sansthan chuan a huaihawt a ni.
Tuak 2,414-te hi darkar ruk pawh tling mang lo chhungin inneihtir an ni a. A hmasa berin mo leh mo neituten garland inhlan tawhin mandap-ah an kutsuihsak an ni.
“Puithiam emaw, sorkarin inneihtir a phal miin emaw an hnam azir zelin an zavai hian a kutsuih a. Hindu puithiamte chu Gayatri Parivaar atanga lo kal an ni a, Muslim Quazi te chu veng thenawm hnai atangin sem an ni bawk,” tiin GWR website chuan a tar lang.
Sakhaw dana kut an insuih zawhah inneih certificate chu sorkar aiawha telin a hlan nghal zel a. Rajasthan Chief Minister Ashok Gehlot leh a Cabinet Minister Pramod Jain Bhaya te pawhin tuak tin hi an lo malsawm zel bawk.
“Tuak tin hi thilpek hlan vek an ni bawk a. Mo tan tlereuh hlan an ni a. Mutbu, choka bungbel leh inchhunga awm tur chi television, refrigerator, cooler, leh induction cooker pek an ni a. Tuak tharte hi ei tur pek vek an ni a, inkhawm chhimtu mi sang chuangte tan pawh ruai buatsaihsak an ni,” tiin GWR hian a tar lang bawk.