Naupang pali, Colombia-a Amazon ramngawa chawlhkar tam tak an vahvaih hnua dama hmuh chhuah lehte chu damdawi inah enkawl mek niin an chhungte nen pawh an inhmu leh ta.
Unau pali – kum 13, kua, nga leh khat te hi an taksa ‘a chak lo hle’ a; mahse, ‘an chhungte an hmu leh chu an hlim hle’ tih an pu, Fidencio Valencia chuan a sawi.
Reilo te chauh an inbia a, an zinga pahnihte erawh an infiam leh thei tan niin thuneituten an sawi.
Naupang palite hi sipai leh tual chhung miten thla khat chuang an zawn hnuah Zirtawpni khan hmuh an ni.
May 1 khan an chuanna thlawhna tla atangin an bo va. An chuanpui puitling, an nu leh thlawhna khalhtu pahnihte chu an thi a ni.
Chhanchhuah hna thawktuten ramhnuaiah hian an hnuhma – an hniak leh thei an ei bân ni awm takte hmuin an chhui zui ta zel a ni.
A te pahnih, kum khat leh kum nga mi hian ramhnuaiah an piancham an hmang a. A upa ber, kum 13 mi, Lesly-i’n an bo chhung hian a kaihruai a ni.
Valencia chuan thlawhna tlaa chhangphut an hmuh ringin an khawsa a, an ei zawh hnuah erawh thei leh thil dang remchang an ei ta zel niin a sawi.
Colombia Defence Minister Ivan Velasquez chuan Lesly-i chu a naute a enkawl danah a fak hle a. Inrinni khan President Gustavo Petro nen damdawi inah an tlawh nghe nghe.
“A hlutna, a hruaina, a enkawlna leh ramhnuai chinchang a hriatna avang chauhvin a naute pathum hi an dam chhuak a, a lawmawm tak zet a ni,” tiin Velasquez-a hian a sawi.
“Naupangte hi damdawi thiamte chuan an dinhmun hlauhthawnawm engmah a awm lo niin an sawi,” a ti bawk.
Sipai doctor Carlos Rincon chuan ‘ei tur tha ei lo’ an nih vangin an taksa a chak lo tih a sawi a; mahse, ‘an taksa nem laiah hliam tenau, thil sehna leh vun kak tlem chauh an nei’ tih a sawi bawk.
Thil an la ei thei lo tih a sawi a, “Vawiinah an taksa endik tur ang ang hi kan zo ang a, thil an ei dan tur chu kan ngaihtuah dawn a. Thil a kal tluan chuan chawlhkar hnih thum vel damdawi ina an awm a ngai ang,” a ti.
Colombian Institute of Family Welfare General Director Astrid Caceres chuan naupangte hi ‘keini duh angin an tawng tam lo’ a ti a. Dam chhuaka thil sawi tur chuan nghah a la ngai tih a sawi.
Hetih rual hian an zinga pahnih erawh an infiam leh thei der tawh tih a sawi.
An chuanna, Cessna 206 thlawhnaah hian an nu hovin Araracuara, Amazonas province atangin San José del Guaviare pawhin an thlawk a, an thlawhna khawl chiang lo vangin an tla ta a ni.
An chuanpui puitling pathumte ruang hi an tlakna hmunah hian sipaiten an hmu nghal a; mahse, naupangte hi an thlawhna tla keh atanga chhuakin ramhnuaiah hian an vak chhuak ta a ni.
May khan zawngtute chuan naupangte thil kalsan ni awm tak tak tak, naute tui um te, sakawrbakcheh te, bakilh te leh an tawmhulna ni awm takte an hmu.
Hniak te reuh tete pawh hmuh a ni a, heng atang hian naupangte hi jaguar, rul leh mihring seh hmang tak rannung tamna ramngawah hian an la dam ngei nia rinna a awm tan a ni.
An hnampuite pawhin naupangte hi thei leh ramhnuaia khawsak dan an hriat avangin an dam theih ngei an rin thu an sawi hlawm bawk.
Ram leilung fate pawhin a zawnnaah hian an pui a, an zawnna helicopter atangin an piin an tawng, Huitoto tawnga a kohna chu an tiri thin a, hei hian a hmuh awlsamtir theih an beisei a ni.