Mizoram sorkarin Manipur raltlante tanpuia enkawlna turin sorkar laipuiah Rs vaibelchhe 10 dil mah se sum hi hmuh a la ni lo a, chhanna dawn a la ni lo.
Chief Minister Zoramthanga’n May thla tir khan DO letter hmangin Ministry of Home Affairs-ah Manipur raltlan chhawmdawlna tur hi Rs vaibelchhe 5 a dil a, hemi hnua New Delhi a zin tum pawhin raltlante puihna tur sum chungchang hi sorkar laipui hotute a sawipuiin a bawhzui zawm.
Hemi chungchanga zawhna chhangin Home Minister Lalchamliana’n a sawi danin, May 16 khan Zoramthanga hian Rs. vaibelchhe 5 dilna hi Prime Minister Narendra Modi hnenah a thlen a. Manipur atanga sahimna zawnga tlan lut hi a sang tela an nih reng avangin May 23 khan Rs. vaibelchhe 10 pe zawk turin a dil leh a ni.
Lalchamliana chuan tun thlengin sum dil dawn a la ni lo tih a sawi a, bakah sorkar laipui aţangin official-in engmah thu leh hla an la nei lo tih a sawi.
May 3 atanga Manipur a chi leh chi kara buaina leh tharum thawhna a thlen khan Manipur tlangrama Zofa tam tak chuan inhumhimna zawngin Mizoram an lut a. Mi sang tel tak tak Mizorama himna zawnga lutte hi sorkarin an ei tur buhfaite leh an awmna turte a ruahmansak bakah an lo luhna khawtlang leh tlawmngai pawl hruaituten an theih ang angin an lo tuamhlawm bawk a. Ei leh in tur leh an awmna turte an ruahmansak bawk a. Sorkar leh khawtlang hruaituten rei tak enkawl zuina tur pawisa an neih loh avangin sorkar laipuiah sum hi an dil ta a ni.
Manipur tlangmi, an sahimna zawnga tlan lut thenkhatin chhung khat laina an bel a, tam tak chu sorkar leh tlawmngai pawl leh khawtlang hruaitute ruahmannain hall-ah te an khawsa a. Thlenna tur nei lote dahna tur (transit camp) Central YMA Hall, Tuikhuahtlangah hriat theih chinah mi 131 lut tawhin, heta tang hian khawpui chhung branch YMA thenkhat – Vaivakawn, Chanmari, Electric Veng, Tuikhuahtlang, Kulikawn, Hlimen, Tlangnuam leh Thuampui ten mikhualte hi an lo thleng darh ve leh.
Transit camp atanga India ram hmun dang danga kal darh leh eng emaw zat an awm bawk a, tunah hian transit camp-ah hian mi 24 an la awm a ni.
Nimin tlai dar 5 thlenga Mizorama Manipur atanga raltlan zat chu mi 10,543 an tling ta a. Tun dinhmunah Kolasib district chu Manipur atanga sahimna zawnga lut tamna ber niin mi 3,754 an awm a. Aizawl district-ah mi 3,750 awmin Saitual district-ah mi 2,542 an awm bawk.
Manipur tlangmiten tun ni hnih khata an belh ve tak, Lawngtlai district-ah chuan Manipur atanga sahimna zawnga tlanchhia mi 10 an awm ve mek a. Heti hian Mizoram district 11-ah Manipur raltlan an awm kim vek tawh a ni.