India leh Pakistan-ah chuan Ningani tlaia cyclone na tak thawk turin a nuai lai tura cheng mi sing tel chu hmun himah an insaseng.
Arabian Sea atanga thawk, Cyclone Biparjoy hi India khawthlang lam, Gujarat-a Kutch velah khawmual a kai dawn a ni.
Pakistan-ah chuan Sindh province vaukam hrutin Karachi khawpui hmun thenkhat pawhin an tawrh a rinawm.
India-ah chuan cyclone-in a ken ruah tam tak sur avanga chhiatna thleng kaihhnawihah mi pasarih an thi tawh.
Gujarat state sorkar chuan vaukam district eng emaw zat atangin mi 38,000 dawn hmun himah an sawn chhuak tawh tih a sawi a. Weather office chuan power supply awm lo leh tui lian a thleng thei tih an sawi lawk.
Biparjoy-in a nuai tur lai velah hian rel tlan pawh tihtawp lailawk a ni a, India-a lawngchawlhna lian ber ber pahnih, Kandla leh Mundra pawh chawlhtir rih a ni tih thuneituten an sawi.
Indian Coast Guard chuan Thawhlehni khan Gujarat vaukama tuialhthei lak chhuahnaa thawk mi 50 chu an saseng tih an sawi.
Mipuite chu tuipui kamah chhuak lo tur leh sangha mantute pawh tuipuia fehchhuak rih lo tura hriattir an ni.
Gujarat vaukamah hian thli leh ruah na tak thawk tan tawhin Kutch leh Rajkot district-ah mi pathum an thi a. Thing a chhem tlu a, kopang min a awm nual bawk tih thuneituten an sawi.
Cyclone hian Nilaini khan vaukam a hnaih lehzual tak avangin Dwarka velah chuan tui fawn pawh a sang sawt hle bawk.
Kutch-ah chuan tui tha chak takin khualzinte intawllenna hmun, Mandvi beach-a puan in tam tak a len chhia.
Thuneitute chuan tuipui atanga km km china awmte chu hmun himah an thiar chhuak vek tih an sawi.
Sipai, navy bakah state leh national relief force-a thawktuten insaseng hna hi an pui a ni.
Gujarat thenawm, Maharashtra-ah pawh ruah tam tak a sur a, tui fawn pawh a sang tawh hle bawk.
Mipa naupang pali, Mumbai-a Juhu-a Arabian Sea-a thawk chhuak, an chin hriat lohte chu Thawhtanni tlai khan an ruang hmuh a ni tih police-in an sawi.
Pakistan-ah chuan national disaster management authority chuan Nilaini tuk thleng khan Sindh vaukam atangin mi 65,000 vel hmun himah an suan chhuak tih an sawi.
An rama National Disaster Management Agency (NDMA) chuan cyclone hian Kati Bandar vaukam atanga km 300 vel leka hlaah a kal pel dawn niin an sawi.
Weather office chuan Karachi, Hyderabad, Tando Allayar, Shaheed Benazirabad leh Sanghar district-ah te ruah tam tak leh thli na tawk tak a thawk dawn tih an sawi lawk bawk.
Pakistan hi kum 2022 khan tui lian rapthlak tak tuarin an ram hmun tam zawk an buai a, mi 1,700 dawn an thi nghe nghe.