Aizawl: Mizoram Pig Producers’ Cooperative Federation (PIGFED Ltd)-in nimin khan Annual General Meeting an nei a. He hunah hian AH&Vety Minister Er Lalrinawma chuan khuallian niin a hman pui.
Khatlaa Polyclinic Hospital Conference Hall-a hun hmanah khuallian Er Lalrinawma chuan Primary Society-te chu ram leh hnam intodelh theihna tura hmalakna fawng pawimawh berte zinga mi an nih avangin, society member-te tanrual a pawimawh thu a sawi a. Sorkara project theh luh reng rengte pawh Primary Society-te dawm kang zawnga hmalakna a nih chuan ngaih pawimawh a nih zel tur thu a sawi.
Khual zahawm Lalmuanpuia, MLA, pawhin sorkarin vawk vultute a ngaih pawimawh avangin kum 2018-a SEDP hmalaknaah pawh a hmasa berte zingah dah a nih thu a sawi a. Vawk hrileng vanga harsatna vangin sorkar hmalakna beisei anga kal tha thei lo chu pawi a tih thu sawiin, “Vawk pul hri avanga harsatna tawkte tanpuina turin sorkarin theihtawp a chhuah reng a. Society te hmasawnna turin sorkar chuan theihtawp chhuahin a tih tur a ti zel dawn a ni,” a ti.
He huna Vety Director Dr Lalrinpuii Sailo-in PIGFED tana AH&Vety. department hmalakna hrang hrangte tar langin, ran chaw man to avanga vawk vultute’n harsatna an neih hre rengin ran chaw siamna (Animal Feed Plant) Sihhmuiah din belh mek a ni.
Chawhnu lamah Business session hman niin, Official Agenda te leh Primary Society atanga agenda lutte sawi ho a ni a. Kum 2023-2028 atana hruaitu thar tur (Board of Directors) thlanna hun hman a ni bawk.
PIGFED Ltd hnuaiah hian affiliated Primary Society 163 awm mekin member 4000 chuang an awm mek a ni.