Aizawl: Vety minister Er Lalrinawma’n nimin khan Tanhrila Zoram Poultry Development Society leh Ramrikawna an department ran chaw siamna hmun a tlawh a, ar note awp keuna hmunah hian arte 16,98,100 thar chhuah a ni tawh.
Er. Lalrinawma chuan sa leh artuia Mizoram a intodelh nana department-in hma a lo lak tawh nate chuan rah tha a chhuah nia a hriat thu sawiin heng hmuna thawktute chu heng kawngah an intodelh nan theihtawp chhuah zel turin a chah.
Animal Feed Plant chuan ran vulhtu mamawh zawng zawng phuhru lo mah se phai atanga lut ran chaw aiin a man a tlawm zawk avangin ran vulhtu tan malsawmna a ni thei tih sawiin, chutiang bawkin ar note awp keuna hmun hma tihlen mek zawh hunah ar vulhtuten broiler chi tha leh man tlawm zawka an lei theihna a siamsak ngei a beisei thu a sawi.
Sorkar thuchhuahin a tar lan danin ran chaw herna hmun, Animal Feed Plant hi kum 2003 bawr vel khan din a ni a, kum 2018 khan NABARD hnuaia RIDF XX sum Rs. nuai 523.53 sengin ran chaw herna hmun khawl leh hmun hma dangte bun belh leh a ni a; ran chaw herna khawl pahnihte hian ni khat ran chaw quintal 120 vel an her chhuak thin a, layer leh broiler chaw chi thum ve ve te, vawk chaw leh bawng chaw atan feed te pawh an siam chhuak a ni.
Ar note awp keuna hmun, Zoram Poultry Development Society (ZPDS) INDBRO Poultry Hatchery Farm hian artui 25,70,740 leh arte 16,98,100 a thar chhuak tawh a, sorkarah revenue Rs. 32,85,679.89 a chhung lut tawh bawk.