Mizoram Pradesh Youth Congress Committee (MPYCC)-in Assembly Speaker Lalrinliana Sailo-in Maryland, USA-a a thusawi chu a chhui chiang turin Chief Minister Zoramthanga leh Deputy Chief Minister Tawnluia an phut.
MPYCC hruaituten nimin khan an president, Laltawnliana in, Zarkawtah thu thar thehdarhtute an kawm a. Assembly Speaker Lalrinliana Sailo-in USA-a a zin tum a, Deputy Chief Minister Tawnluia department chan pakhat hnuaiah Rs. nuai 100 chuang hnathawhna awm loa ziah ral a awm tih a hriat thu Chief Minister Zoramthanga leh deputy chief minister te thutdun lai ngeia a hrilh thu leh, an department chan en uluk a tul thu a hrilh nia a sawi chungchang chu ngaihthah chi a nih loh thu an sawi.
MPYCC President Laltawnliana chuan, “Assembly speaker meuhin chief minister awm lai ngeia deputy chief minister khaka a department chana Rs. nuai 100 chuang hmanna awm loa ziah ral a nih thu a hrilh bakah, an department chan enkawl uluk tura a hrilh hial hnuah pawh MNF sorkar Chief Minister Pu Zoramthanga kaihhruai hian ngaihven lovin eirukna hi a ngai pawimawh lo tih a tilang chiang hle a ni,” a ti.
Assembly speaker meuhin eirukna a awm tih a sawi chhuak a, a chian em avang leh thu tling a nih avangin rang takin sorkarin action a la ang a, thil tidik lotu chu a chhuichhuah vat an rin avangin engmah an sawi duh lawk lo tih sawiin Laltawnliana chuan, “Amaherawhchu, vawiin ni thlengin engmah hmalakna awma kan hriat loh avangin kan rawn tawng chhuak ve ta chauh a ni. Chiang taka eirukna awm nia langah pawh kan sorkar hian hmalak a tum lo hi na kan ti a, hetiang thil chiang pawh a chhuichhuak ngam lo a nih chuan MNF hi sorkar zel tlakah kan ngai lo,” a ti.
Laltawnliana chuan chief minister leh UD&PA changtu dy. chief minister te, kumin January 30-a assembly speaker meuhin a lo hrilh hriat tawh, thla nga chuang a ral tawh hnuah pawh an la ngawih bopui zel theih avang hian chief minister leh dy. chief minister te hi he sum ziah bo chungchangah hian a kaikuang ber an lo ni zawk em tih chu an zawhna a nih thu a sawi.
Congress Thalai president hian, “He puanhnuai thil nia hriat hi a rang thei ang bera MNF sorkar hian chhui chiang tura hma a la lo a nih chuan, kan thiam dan ang angin thu dik hriat a nih hma chuan a tawp thlengin kan chhui zui dawn a ni,” a ti bawk.