Tun hnaiah Serchhip district chhung, East Thinglian khuaa kel an vulhte chu a thi nasa a, kel natna Peste des Petits Ruminants (PPR) an vei vanga thi nia hriat a ni.
The Zozam Times zawhna chhangin East Thinglian khawtlang hruaitute chuan, April thla chawhnu lam atang khan an kelh vulhte chu an damlovin an thi tan tih an sawi a, hetiang kel natna hri a len tanna nia an hriat chu an bialtu MLA-in an khuaa chhungkaw awm zawng zawng hnenah kel a sem a, kel an dawn thar atanga kar hnih hnu velah an kel vulhte chu a thi tan tih sawiin, kel an vulh zawng zawng deuhthaw chu a thi tawh a, tunah hian kel panga vel chiah an dam tawh tih an sawi.
Khawtlang hruaitute chuan an khuaa kelte a thih chum chum hnuah vety doctor rualin an khua chu tlawhin kel thite chu an postmortem a, sample lain endik a ni tih leh Peste des Petits Ruminants (PPR) natna vanga thi a ni tih finfiah a nih thu an sawi.
East Thinglian khawtlang hruaitute chuan an khua chu kel vulh nasa khua an ni a, hemi avang hian an bialtu MLA Er Lalrinawma’n kel thar chhuak tam turin project a siam a, a MLA fund atangin kel leiin chhungkaw awm zawng zawng, 84-te chu kel hi a sem vek a, MLA fund kaltlanga kel an dawnte hi Silchar chhehvel khuaa lei nia an hriat thu an sawi a ni.