Bengal Chief Minister Mamata Banerjee chuan nimin khan eptu hruaitu mi 10 hnenah lehkha thawnin, BJP bei let tura tanrual an ngaihtu a hrilh.
Congress President Sonia Gandhi hnenah pawh lehkha a hi a thawn a, tuna assembly inthlan zawh hnu lamah hian thawhho a ngaih thu a hrilh.
A thawhpui thin, Suvendu Adhikari nen Nandigram biala an inkhin nat hle laiin Mamata hian lehkha hi ziakin, ‘BJP-in mipui rorelna leh danpui an beihna chhang let tura tanghova na taka chet a ngai’ tiin a ziak a. ‘India mipui aiawha an chet chhuah a ngai’ tih a ziak bawk.
Tun hnaia Delhi Lieutenant Governor hnena thuneihna sang zawk pekna tur dan pawm tak atanga bul tanin, Banerjee chuan BJP-in mipui rorelna an palthluk dan leh sorkar laipui atanga thil thunun vek an tum dante a tar lang.
“BJP hian an party ni loten danpui hnuaia chanvo an neihte hman theih lohtir an duh a, state sorkar pawh hnuk hniama khawpui roreltu ang leka chantir an tum a. A tawi zawngin, India-ah hian mi pakhat rorelna din an tum a ni,” a ti.
“Delhi-a thil an tih dan pawh hi pawmzam mai chi a ni lo, thuneihna chan zel an duh a, sorkar laipui hian mipui thlan sorkar tana harsatna a siam zel,” a ti.
Bengal chief minister-in sorkar laipui thuneihna hman sual a tar lan zingah hian governor thuneihna te, central agency thenkhat – CBI leh Enforcement Directorate an thunun dan te, National Development Council leh Planning Commission an thiah dan te, pawisa hmanga BJP sorkar ni lo an paih thlak dan te, ram thil pawimawh mi mal kuta hlan leh state leh sorkar laipui inkungkaihna an tihbuai dante pawh a tar lang.
“Tun hi BJP-in danpui leh mipui rorelna an beihna laka kan tanrual leh awmze nena kan beih let hun niin ka ngai a. TMC chairperson ka nih angin hetiang rilru pu ve dangte chu thinlung takin ka thawhpui zel ang,” tiin Banerjee hian a ziak.
Gandhi bakah hian Nationalist Congress Party chief Sharad Pawar, DMK hruaitu Stalin, Shiv Sena chief Uddhav Thackeray, YSR Congress chief Jagan Mohan Reddy, BJD chief Naveen Patnaik, Telangana Rashtra Samithi chief K.Chandrashekar Rao, Samajwadi Party hruaitu Akhilesh Yadav, Rashtriya Janata Dal hruaitu Tejaswi Yadav, Aam Aadmi Party chief Arvind Kejriwal and CPIML hruaitu Dipankar Bhattacharya te hnenah pawh lehkha hi a thawn.