Arsenal, Barcelona leh Chelsea midfielder Cesc Fabregas chuan football khelh a chawlhsan thu a puang.
Kum 36 mi hian Spain leh England-ah te club football hlawhtlinna hrang hrang a tawn bakah ram tan World Cup a chawi tel a, khawvela midfielder tha zingah chhiar tel a ni reng tawh ang.
A huntawp hi Italy-ah Serie B club Como-ah a hmang a, an hnenah hian kum hnih contract ziak mahse season khat hnuah a chawl dawn.
Como reserve leh youth team-te enkawl chhunzawmin coaching lam a luhchilh nghal tur thu a sawi tel.
Fabregas hian kum 10 mi niin kum 1997 khan Barcelona academy lar La Masia a zawm a. Kum 2003-ah kum 16 mi niin Arsenal zawmin professional football an hnen atangin a khel tan.
Premier League match 212 khelin Arsenal tana a khelh chhung hian FA Cup vawikhat a chawi.
Barcelona-ah kir lehin La Liga title a lak hnuah Chelsea-ah a kir leh a, Premier League title vawi hnih a chawi.
Ram tan vawi 110 inkelin kum 2008 leh 2012 khan European Championship a chawipui a. Kum 2010 World Cup-ah an champion bawk.
“Ka boot khai hun a thleng ta tih hi hreh tak chunga ka sawi a ngai.
Barca a bul a ka tan ni atang Arsenal, Barca a kir leh, Chelsea, Monaco leh Como a ka hun hmang zawng zawngte ka roh em em reng tawh ang.
World Cup chawi atanga Euro te, England leh Spain a chawi theih zawng zawng ka chawite leh Europe a inelna lian a hlawhtlinnate, ka zinkawng hi ka theihnghilh tawh dawn lo.”
“Lungngaihna vek erawh a ni lo, mual lehlam ka kai dawn a, Como 1907-ah B team leh Primavera team te ka enkawl dawn a, coaching zinkawng ka tan dawn. He club hian a tir atangin ka thinlungah hmun pawimawh a chang a, hun dik takah kan intawng a ni.”