Japan leh Philippines ramte chuan a vawi khat nan boruakah sipai nunchan an zir dawn niin Manila-a Japan embassy chuan a puang.
Nunchan an zir dun tur hian ram venhim hna chungchanga an thawh dunna kawngah thuk zawka inpawhna a siam ngei a beiseiawm tiin an tar lang.
Ram pahnih air force-te hian mihring puihna tur leh chhiatrup thleng thei laka tanpuina pek dan tur an zir dawn a. Japan embassy chuan ‘mellung pawimawh tak a ni dawn’ tia sawiin, July 5-8 hian Philippines khawchhak rama United States sipai inkulhna hlui, Clark Air Base-ah hun an hmang ang.
Joint exercise-ah hian Japan-in an indo thlawhna lian, C-130H cargo plane leh a hnathawkte leh Philippine airmen-te chuan hmun kilkhawr zawka tanpuina pek dan tur an zir dawn a ni.
“Japan leh Philippines hi khuarel chhiatna tawng nasa ram an ni a, mihring chhanchhuahna atan hetiang nunchan hi kan inzirtir tawn a ngai a ni,” tiin Japanese Air Self Defence Force unit commander Maj. Mizuno Masaki chuan thuchhuah a siam.
Kum 2013-a Phillipines ramin super typhoon Haiyan an hmachhawn tum khan Japan hian tanpuina a lo pe tawh a, hemi tum hian mi 6,000 velin nunna an chân phah a. Chhungkaw sang tam takin an in leh lo an rauhsan a ni.
Japan leh Philippines-te hian kum 2015, January thla khan ram venhimna kawnga thawhdunna thuthlung an lo ziak tawh a, hemi hnu hian tui lama ral rel nunchan vawi 17 lai an lo nei dun tawh.
Japan hian South China Sea-a Phillipines patrol-te tihchangtlunna atan tunlai thiamna changkang tak tak an lo pe tawh bawk.
China sipaiten helai hmun velah hian tun hnaiah huang an zauh zel avangin US leh a thawhpuiten hmalak ve zel an rel niin a lang.