Sri Lanka hnaih tuipuiah tun hnaia bungraw phur lawng lian kang ngawng chu khuarel lam ngaihtuahtute hlauh ang ngeiin tuipuia cheng nungchateah a lang tan a, tuipui kamah a thi tam tak tuiin a len chhuak tawh.
June thla tir khan Colombo tuipui kam hnaihah X-Press Pearl lawng hi ni eng emaw zat a kang.
He chhiatna thlengin a nghawng vangin sumsi 76, dolphin 20 leh nghapui pali chu tuipui kamah thiin chhar an ni tawh.
X-Press Pearl hian a kan lai hian bunker fuel oil tonne 278 bakah gas oil tonne 50 lai a phur a. Nitric acid tonne 25 bakah chemical leh cosmetic lam chi thahnem tak a phur bawk.
Environmental group pakhat chuan kangmei chhuahna hmun bialah hian he lawngin bungrua hlauhawm tak tak a phur hte put atang hian ‘chemical soup’ a insiam dawn ngei nia an hriat thu an lo sawi lawk tawh.
Sri Lankan Environment Minister Mahinda Amarweera chuan tun ang fur hunlaiin tuipuia chengte hetiangin an thi nasa ngai lo niin a sawi a, “Tuna mite hi lawng kangin a nghawngte an ni,” tiin thuthar lakhawmtute a hrilh.
Sri Lanka-a an tuipui kam hmun nuam leh pawimawh tak takah hian lawng a kan atanga reilo teah tuialhthei put a lang tan a, plastic chhia tam tak leh rannung thi tam tak hmuh a ni.
Helai hmun bialah hian hun eng emaw ti chhung sangha man an khap tawh hnuah phalna tihchhuah a ni leh tawh.
Sri Lanka sorkar chuan kangmei thelhna atana senso leh sangha mantute leh helai biala ei zawng mi 50,000 chuang a tihbuai vangin insurance atan dollar maktaduai 40 an ngiat mek.
Lawng chhiatnain tuipuia chengte a tihhlum vang hnuah hian Sri Lanka-a mite chu thuneituten an rama he lawng a luh an phal avangin an thinur hle.