Aizawl: Mizoram Pradesh Congress Committee (MPCC) chuan Chief Minister Zoramthanga chu Manipur-a Zohnahthlakte tana hmalak ngaihna hre loa puhin, MNF sorkar chu Zohnahthlakte chunga rawng taka chetna titawp tura hmalakna kalpui thuai turin an ngen.
Nimina thuchhuah an siamah MPCC chuan Kristiante ni serh, Pathianniah ngei Langza khuaah Meitei ho lutin chenna in bakah Pathian biak in nen lam an hal fai vek a, Zohnahthlak, a unaute chhanhim tuma beitu, David Thiek chu Meitei hoin rawng taka thata a lu tansakin, khaw daiah rapthlak taka an tar lan thu media lamah tar lan a nih thu an sawi.
Manipur-a Zohnahthlakte an rum takmeuh laiin Mizoram Chief Minister Zoramthanga hian hmalak ngaihna hre lovin Zohnahthlak unaute himna leh damkhawchhuahna lam pawh ngaihtuah lovin campaign buaiah puhin MPCC chuan, “Amah pawh be duh lotu, Manipur Chief Minister Biren Singh-a’n Zohnahthlakte chunga rawng taka chet hnuah phone hmanga biain chu chu a hmalakna neihchhun a ni. Pu Zoramthanga chief minister-na hnuaiah hian Mizoram leh Zohnahthlakte dinhmun a him lo takzetah Congress party chuan a ngai a ni,” an ti.
MPCC chuan Manipur-a Zohnahthlakte chunga rawng taka chetna titawp tura hmalakna kalpui thuai turin MNF sorkar a ngenin, “Kan unaute dinhmun hima an awm hma loh chuan BJP an thawhpuina pawh a rang lama chhu chat nghal turin kan ngen,” an ti a, MNF party nge a dah pawimawh Mizoram mipui leh Manipur-a Zohnahthlakte himna tih thlang fel thuai turin an phut thu an sawi.
Central hotute leh state-a Congress hruaitute nen inberawn zelin heng an unaute sahimna tur hian chak zawk leh nasa zawkin hma an lak zel tur thu an sawi a. Zohnahthlakte leh Kristian sakhua chimral tuma nekchep mektu, BJP paihthla tura tangrual turin Mizoram chhunga NGO te, Kohhran leh party hrang hrangte an ngen bawk.