Texas, United States rawlthar, kum riat chuang liam taa kum 17 mi nia mak tak maia bo pil hmiah chu Inrinni khan dama hmuh leh a ni a, tunah erawh tlangval puitling, kum 25 zet a lo ni tawh.
NBC News-in a tar lan danin Houston-a cheng, Rudy Farias-a hi a bo tirh hian ram pumah ngaihven a hlawh a, kum tam tak hnuah Texas Centre for the Missing chuan ‘dama hmuh’ a nih leh tak thu a puang a, damdawi inah a awm mek a, a awm chhan erawh tar lan tel a ni lo thung.
Farias-a hmuh hnuhnung ber hi March 6, 2015 daih tawh kha niin Houston hmarthlang lama an chenna in atangin a ui pahnih kaia a chhuak a ni.
A uite hi an hrui pawh tel lovin inah an let leh mai a; mahse, hetih laia rawlthar chhuak chho, Farias-a erawh a bo ta hmiah thung a ni.
A chhungte chuan hetih lai hian Farias-a hi depression nei lai a ni a, a hma kuma motorcycle chesuala a unaupa a thih hnuah phei chuan a nasa lehzual niin NBC News chuan a tar lang.
“A unaupa hi khawvela a thian tha ber a ni a. Mi dang zawng zawng nen aiin sulhnu pawh an ngah a ni,” tiin hetih laia an chhungkuain amah zawng tura an chhawr, Brenda Paradise chuan April, 2015 khan a sawi a ni.
ABC7-in a tar lan dan chuan Texas EquuSearch chuan Farias-a awmna hriat theih nan hian vantlang puihna pawh an dil a; mahse, eng an ang thei chuang lo a ni.
March 10, 2015 khan a nawlpuia zawn chu tihtawp a ni ta hial a; mahse, thuneitute chuan thu hriat thar an nei leh a, a hnu ni hnih, March 12 khan an zawng thar lehnghal a; mahse, beidawng bawkin a tukah an tawpsan leh ta a ni.
March 13, 2015 khan thuneitute chuan ruah tuiin a chim pil vel hmun haia Farias-a zawngtute fakawm an tih thu an sawi tih ABC7 chuan a tar lang nghe nghe.
Bei pawh a dawn hnuah July 2, 2023 khan thuneituten Farias-a chu a la dam tih an finfiah tih an puang ta a, a bo dan leh hmuh leh a nih dan kimchang erawh an la puang lo.