Russia chuan United States hnenah ‘mei alhin infiam suh’ tiin tûra sorkar eptu, Alexei Navalny-a hrai nia puhna chungchangah vaukhanna thuchhuah a siam.
Thawhlehnia US ramin Russia ram hruaitu mi pawimawh thenkhatte a hrekavangin Russia a lungawi lo hle.
Nikum August thlaa Kremlin sawiseltu chungchanga US hnuchhui thiamten an thutlukna, Moscow hmalaknain tûr hmanga hrai ngei a nih thu leh an ram hruaitute laka hrekna dan chu US chuan European Union pawmpuina hmangin nimin khan thuchhuah a lo siam tawh a ni.
“Kan ram rorelna chungchangah ram dang inrawlh a ngai lo, kan inching fel thei. A che hmasa zawkah kan tang lo vang. Amaherawhchu, min rawn beitute erawh chuan na takin kan chhang let ang,” tiin Russian foreign ministry thupuangtu, Maria Zakharova chuan a sawi a. US chu thudik ziktluak lo hmangah a puh.
“US chuan an tual chhung buaina lakpen an duh vang mai maiin an hmelma ramte chu, an ram rorelna chhe tak anga kalpui ve angah min puh let suh se,” a ti bawk.
Joe Biden-a rorelna hnuaia thawktute chuan Russia thuneitu mi pasarih lakah US rama an thil neih zawng zawngte khawih chet phal lovin an khapsak a. Russia rama hnuichhuitu pawl, Federal Security Service of the Russian Federation (FSB) director pawh a tel a. Heng mi pasarihte lo tanpuitu reng reng chu dan kalha chea puh theih an ni bawk.
August 20, 2020 khan FSB-a thawkte chuan Navalny-a chu nerve tichhe thei, Novichok tûr hmangin an hrai a. He pawikhawihna hi US hnuchhuitute chuan inrinna sang tak nen a dik ngei niin an puang.
US Secretary of State Antony Blinken chuan, “Russia ramin chemical weapon hmanga mihring laka rawng taka a chetna avanga US sorkarin a thuneihna a lek vanga nghawng a neihte chu chiang takin a hriat theih mai awm e,” tiin thuchhuah a siam bawk a ni.