Formula 1 world champion Max Verstappen-a’n chungnung takin a world title pathumna ni tur a pan. Austrian Grand Prix-ah el pha tak tak an awm lo tilang lehin pakhatna a hauh a, a zawnin vawi nga intlansiakah hnehna a chang tawh.
Austria-ah hian Verstappen-a’n kartawp duhthusam a hmang a. Inelna awm zawng zawng – qualifying, sprint shootout, sprint race leh intlansiak pangngaiah te hnehna a chang vek. Intlansiak laia lap khat tlanchhuak rang ber, point khat ken belh fastest lap pawh amah bawkin a la.
Verstappen-a hnungah hian nikum lama a elpui Ferrari car khalhtu Charles Leclerc chu pahnihna a ni a. A Red Bull teammate Sergio Perez chuan pathumna a luah ve thung.
El rual loh Max
Pathianni zanah Austria a Styria tlang ram a tlankawng Red Bull Ring-ah tualchhung team Red Bull Racing an hlawhtling.
Car tha ber nei an ni a, world champion ni lai leh tunlaia driver tha ber ni bawk an kawl tel. Hemi pahnih inkawp hi tu tan mah dan theih an ni lo tih kuminah a chiang.
Inrinni sprint race-ah pawh a fal tawh viau a, qualifying-ah pawh a tlanchak anga tlan ve thei an awm lo.
Tun season intlansiak vawi 9 awm tawh atangin Dutch driver Verstappen hi vawi sarih pakhatna a nihna a ni. Intlansiakah a hmasa ber atangin a tlan chhuak tan a, a tir lamah Leclerc-a’n theihtawpin han nawr ve mahse a tibuai tak tak pha meuh lo.
A tawp thlengin harsatna a nei zui lova, Ferrari in theihtawp chhuahin an thluak sen avangin hmahruaitu ni ve hman mahse rei an dang thei chuang lo.
Verstappen a chungnunzia tilang turin intlansiak tawp dawnah fastest lap a neih theihna turin lap 69-naah pitstop a siam leh a. Car ke thar vuahin heti chung hian Leclerc-a’n a hnaih hman chuang lo.
Point 81 in world championship-ah Verstappen hian hma a hruai mek a. Kuminah tu tan mah lehpelh leh theih a beiseiawm tawh lo.
Tun thla a intlansiak pathum awm turah tel lo vek pawh nise July thlaah hma a la hruai dawn tho a ni.
“Kartawp duhawm tak a ni a, hei aia tha hi a awm theiin ka ring lo. Team angin kan che tha a, strategy leh pit stop leh engkim kha a felfai em em vek. Intlansiak hma in khua leh tyre awmdan turte a hriat loh avangin a huphurhawm viau a, mahse tha takin hun kan hmang thei.” tiin a sawi.
Midang an hmuhnawm
Red Bull Ring tlankawngah ngil a tam a, chak lehzual a tlan theihna hmun a ni. Hei vang hian car inum a hmuhnawm.
Ferrari in car upgrade thenkhat an hmang a, Red Bull car nen kawng ngil a tlanchak theih zawngah an inthlau lo. Lap 14-naah virtual safety car kalpui a nihlaiin remchang an la a, an car ke thlakin Verstappen lakah an chan a that phah. Hei hi an hlawhtlinpui zo lo chungin F1 a dawhsan an luah vawi 800-na ni turin Leclerc-a’n pahnihna a hauh. Pali-naah Carlos Sainz tlan thleng bawk mahse track limit hremna a hmuh avangin paruknaah a tla thla.
Mercedes erawhin an duh ang car set up an nei lova, a hmalam an um thei lo. Lewis Hamilton chu pasarihnaah tlan thleng mahse ani pawh hrem niin pariatnaah a tla thla.
British driver beiseiawm Lando Norris tan intlansiak duhawm a ni a. McLaren in car upgrade an hman chuan awmzia neiin a hma a awmte a um thei hle bawk.