Korean band zinga UK music festival-a headline changpha hmasa ber ni turin BlackPink-i’n history ropui tak an siam.
K-pop hmeichhe group te hian London khawpuia BST Hyde Park-ah inlanin, sold-out concert pui tak an nei a, mipui 65,000 zetin an lo dawngsawng.
Fan te zingah hian England-a chengte mai ni lovin, khawvel ram hla tak tak atangte’n an lo kal a, Blackpink hmuh ngei tumin an hun leh tha, sum leh pai an seng hnem hle.
Member pali awmna BlackPinnk-ah Lisa (26), Thailand, Rose (26), New Zealand/Australia, Jennie Kim (27) South Korea leh Jisoo Kim (28), South Korea te hian rimawi khawvela K-pop band hlawhtling ber zinga tel tur leh khawvel huap ang pawha band ropui ber zinga langpha turin kum 6 zet bootcamp hautak an paltlang a ni.
Kum 2016 khan debut single, ‘Whistle’ hmangin rimawi khawvel an luhchilh a. Tunah hian YouTube-a follower ngah ber ber an nih bakah K-pop girl band zinga album maktaduai khat chuang hralh thei hmasa ber an ni bawk.
An record thar ber, ‘Born Pink’ kha UK chart-ah number one a hauh chiang hle a, member belhkhawma instagram-a follower an neihzat hi maktaduai 356 a tling hial.