Taliban chuan hmeichhiate hrekna tipung lehin Afghanistan-a sam siamna leh hmai cheina hmun (hair & beauty salon) zawng zawng khar turin a ti.
Vice & Virtue Ministry thupuangtu chuan he thupek hi July 2 atang khan an hmang tan niin BBC chu a hrilh a, a hma thla khatah khan khar tura tihna hriattirna hi pek chhuah a ni tawh tih a sawi bawk.
Kum 2021-a Taliban-in thuneihna an chan leh hnuah khan hmeichhiate zalenna hi nekchep telh telh zel a ni.
Tleirawl leh hmeichhiate chu zirna in, gym leh park-ah an luh ve an phalsak lo va, tun hnai lehzualah khan hmeichhiate hi United Nations hnuaia an thawh pawh an phalsak lo zui leh.
Taliban hian hmeichhiate hi pawna an chhuah reng rengin an mit chauh tih loh chu khuh vek turin an ti a, an awmna atanga km 72 china hla an zin chhuah dawnin an laichin mipain an kalpui ngei ngei turin an ti bawk.
Heti taka hmeichhiate zalenna an sawi zimsak avang hian khawvelin Taliban hi a dem a, an hmeichhiate pawhin duh lohna an lantir a, an dikna chanvo humhalhsaktute pawh an tawng chhuak nasa tawh hle.
Beauty salon hi Afghanistan-a thuneihna an chan hmasak hun lai, kum 1996 leh 2001 inkarah pawh khan an lo kalpui tawh a ni a. Kum 2001-a US kaihhruaia rûn an niha an thuneihna paihthlak a nih atang khan hawn a ni zui leh ta chauh a ni.
Khapna thupek an chhuah thar leh chungchangah hian Afghan hmeichhe pakhat chuan, “Taliban hian Afghan hmeichhiate dikna chanvo bulthum tam zawk hi a lak bosak a ni,” a ti.
“Hmeichhiate dikna chanvo hi an bawhchhe nasa a. Tuna thutlukna an siam leh pawh hi hmeichhiain a hmeichhiatpuite a puih theihna tihtawpna a ni a. Ka hriat tirh atang khan mi a barakhaih tak zet a ni,” a ti.
“Taliban hian hmeichhiate taksa chungchang bak political plan engmah a nei lo ni maiin ka ngai a. Vantlang atang hian hmeichhiate tihbo hi a tum a ni tawp mai,” a ti.