Sub-District Hospital : Tlabunga nurse indaih lohna zualpui phuhruk nan Tlabung VC leh MZP Sub-Hqrs tangkawpten nurse pahnih an chhawr dawn.
Tlabung SDH-ah hian hlawh hranpa nei loa a tul apiang thawk tura inpe nurse thenkhat an awm tih, Tlabung VC leh MZP chuan sawiin anmahni avanga mualpho lo mai zawk an ni tih an sawi a; nimahsela, heng mite hi vawiin atang hian chawlh an tum tawh avangin Tlabung VC leh MZP chuan an lawmman tur tumin an tlin chhung chu an chhawr chhunzawm dawn ta a ni.
Tlabung Village Council leh MZP-te chuan Health department hnuaia staff nurse eng emaw zat lak thar tur zingah an khuain nurse pahnih tal chang ve thei se an duh tih an sawi a, hei bakah hian tun dinhmunah MBBS doctor pakhat chiah an neih avangin training leh thil danga doctor awmchhun a kalchhuah changin doctor an nei lo fo niin an sawi.
Tun dinhmunah Sub-District Hosipital : Tlabung hian mihring sing thum chuang tuamin, staff nurse pali, a ngheta thawk pahnih leh a nghet loa thawk pahnih an awm mek a, tunlai hian damlohnain a tlakbuak an tam avangin nurse an indaih lo lehzual hle tih, Tlabunga The Zozam Times palai chuan a sawi a ni.