Aizawl: MPCC Social Media department huaihawtin nimin khan social media hman kawnga inzirtirna hun an hmang.
MPCC Meeting room-a Social media hman kawnga inzirtirna hi Vanneihthanga Vanchhawng chuan a nei a ni.
Vanneihthanga Vanchhawng chuan khawvel ramn changkang te ang bawkin Mizoramah social media-in chhungkaw tin a luh chilh tawh a, mi mal tin mai hi social media chakna in a nawr tawh tih sawiin, “Naupang atanga pitar putar thlengin zing thawh atanga zan mut thlenga min thununtu pakhat a nih tawh avangin social media chakna hi Mizoram leh Mizo hnam tan hmanraw tangkaia kan chantir a ngai a ni,” a ti.
Awlsam zawk leh hahdam zawka hmanraw tangkai leh tha tak a nih theih laiin social media avangin mi tam takin buaina leh harsatna, mualphona an tawh phah chu pawi a tih thu Vanneihthanga Vanchhawng chuan a sawi a. Mi dang tihchhiatna hmanruaa chantir lovin he hmanraw chak tak hi mi dang dawmkang a, zirtirna tha petu, mi dang khaichhuahna hmanrua atan hman a tul tih a sawi bawk.
Lalnunmawia Chuaungo, IAS (Rtd) pawhin khawvel leh India ram thlirin media chakna hian nghawng tam tak a tha zawng leh tha lo zawngin a nei nasa a. Hemi kawngah hian Congress party chu ram leh hnam, nitin khawsak hona kawnga inhmelmakna siam thei lakah an inthiar fihlim a tul thu a sawi.
MPCC Social Media department Chairman C Lalhriatpuia kaihhruai inkhawmah hian AMC Ward No. V Corpoarator Rosiamngheta leh Lalremruata Renthlei te pawhin thu an sawi bawk.