Brighton and Hove Albion chuan Netherlands Under-21s goalkeeper Bart Verbruggen chu Anderlecht atangin Pound maktaduai 16.3 in an lalut.
Kum 20 mi hian kum nga contract a ziak a, tun nipui a Seagulls in player an lakluh palina a ni.
Feet 6 leh inches 4 a sang goalkeeper hian tun season tir khan Anderlecht reserve team tan la khel mahse first team a ko a nih hnuin first choice goalkeeper a ni nghal thuai.
March thla khan Netherlands senior team-ah ko a ni a. Tun season liamta a Anderlecht Player of the Season a thlan a ni bawk.
Brighton head coach Roberto de Zerbi chuan, “Bart kan lalut thei hi thil lawmawm a ni. Kan football khelh duhdan ang a khel thiam a, hei vang hian kan team-ah a inbengbel thuai ang. Kan club tana player pawimawh tak la ni thei tur a ni.” tiin a player thar chungchang hi a sawi.
Brighton hian tun nipuiah Watford atangin Brazil forward Joao Pedro an lalut tawh a. James Milner leh Germany midfielder Mahmoud Dahoud te pawh an lalut tawh.
Goalkeeper ball pet thiam, sweeper keeper anga khel thei a nih avangin ngaihven a hlawh viau a. Hetihlai hian ani an lakluh avang hian Spain goalkeeper Robert Sanchez chu chhuak mai tura ngaih a ni thung.