Wimbledon champion Novak Djokovic chuan a lallukhum humhim turin bul a tan a. Wimbledon tan ni ah hnehna a chang nghal.
Thawhtanni-ah Centre Court a inkhel hi ruah a sur avangin a khaihlak a. Nimahsela Djokovic-a’n harsatna neih phah lovin Pedro Cachin 6-3 6-3 7-6 (7-4) in a hneh.
An inkhelhna hmun hi a chung nei a ni chungin set khatna an khelh zawhah minute 80 dawn chawlh a ngai a. Wimbledon hi phul tak chunga khelh a nih avangin court hul lovah a khelh theih loh.
Kum 2013 final a Andy Murray laka a tlawm hnua Centre Court a la tlawm leh miah lo Djokovic hian set khatna an khelh zawhah court chu a nal tawh lutuk tih a sawi a. A ro har bawk avangin hun rei zawk an chawl ta a ni.
An inkhelh chhunzawm leh hnuah set hnihnaah a khingpui service vawi hnih a break sak a. Player pahnih inthlauhna langin a tawp thlengin harsatna a nei lo.
“Ruah vangin thil kan beisei angin a kal lova, entu mipui lam pawhin an nghah rei a ngaih phah. Inkhelh kan duh ve ve a, mahse court a nal avangin inkhelh a harsa. Ruah a sur zawh a court chung hawn a nih hnu kha chuan a inkhelh leh theih nghal thuai mai.” tiin Djokovic chuan a sawi zui.
Inkhel dang
Mipa singles inkhel dangah quarter-final a Djokovic nena inhmachhawn thei seeded number seven Andrey Rublev chuan Max Purcell 6-3 7-5 6-4 in a hneh.
Russian leh Belarusian player-te nikuma tel an phal loh kuminah Rublev a tel a. A chak hnuah, “Wimbledon hi ka khel tam lova, ka inhliam a nih loh leh hri vangin ka khel lova, tel thei lova siam kan ni zui leh bawk. Hei vang hian kuminah ka inkhel thei hi ka tan chuan thil lawmawm tak a ni.” a ti.
Seeded number four changtu Casper Ruud chuan hnehna chang turinset li a khelh a ngai a. Laurent Lokoli chu 6-1,5-7,6-4,6-3 in a hneh. Vawi thum Grand Slam champion tawh Stan Wawrinka pawh 7-5 7-5 6-4 in a chak nghal.