Aizawl : ZPM Consultant F Rodingliana chuan nimin khan Lamzawl Branch MHIP-in MHIP Day vawi 49-na lawmnaah khuallian niin a hman pui a. Lamzawl Branch MHIP office building thar a sak sak a hawng nghal bawk.
Lamzawl Community Hall-a MHIP Day lawmnaah F Rodingliana chuan Zoram khawvelah hmeichhiate’n a bik takin ram hruai kawngah chanvo pawimawh tak an neih tak avangin khawtlang hruaitu ni tlaka inchher chhoh zel a pawimawh tih a sawiin, “An kar vang emaw, an nawrna vang emaw pawhin khawtlang leh kohhran rorelnaah te pawh chanvo pawimawh tak an lo hauh thluah theih tawh a. An chanvo leh mawhphurhna te pawh an hnehsawhin, an tlin hlawm viauin ka hria,” a ti.
MHIP member te hian ram dinhmun dik tak hre chungin, hmeichhiate dinhmun chawikan an tumna kawngah an fa hrin, mipa te dinhmun pawh ngaihthah chuang hauh bik lo tura chahin; a bikin sorkar department hrang hrangah hmeichhia an tam tawk em em a, department lu ber thlengin chanvo chelh thei hi an awm a, heihi a lawmawm rualin, nu te hian mipa fa te hi tun aia hmasawn an ngaihna hi an hriatpui a tul tih a sawi.
Lengteng bial vil tura ZPM in an ruat F Rodingliana chuan Zoram politics-ah hian hmasawnna lian tham thil thar hmuh tur a awm lohna a rei tawh viau tih a sawi a. Tun hunah hian Mizo thalai zawkte, mi thiam leh fing tak tak te’n ram politics hi an rawn vei tharin an thang harh viau niin a lang a, hei hi nuho hian kan lo chawm len pui chuan hun rei loah Pathian Lalna Zoram thar kan din mai dawn a ni, a ti.
MHIP Day lawmna inkhawm hi Lamzawl MHIP President Sanghlupuii’n a kaihruai a. Khuallian F Rodingliana hian Lamzawl MHIP office sak thar a hawng nghal bawk a ni.