Assam Rifles-in Zemabawk Zokhawsanga huan lo ram neitute an hmun paltlang an phal loh avanga lungawi loin Assam Rifles gate bulah an pungkhawm a, lirthei kal theih loh turin kawng laih chah tumin an thawk chhuak a. Sorkar hotute nena an inbiak hnuah chawhnu dar 3 vel khan an tin.
Zokhawsanga huan lo ram neitute intelkhawm Khuangkhau Lui Zau Association leh Zokhawsang Farmer Society te hian an feh dawnin Assam Rifles-in an hmun paltlang an phal loh thin avangin lungawi lohna lantirin nimin chawhma dar 10 atang khan Assam Rifles gate bulah an pungkhawm tan a. Assam Rifles panna kawng laih chah tumin lei laihna excavator (JCB) nen hnatlang turin an thawk chhuak a. Hun eng emaw chen an punkhawm hnuah sorkar hotute leh an pawl hruaitute an inbiakna hriattir an nih hnuah harsatna siam loin an tin darh a ni.
Huan neitu lungawi lo pungkhawmte hian thu ziak hrang hrang – Mizoram sorkar chu sorkar laipuiah thudik lo pe tawh lo turte, chief minister bialah kut hnathawktute an mangan thu te, kuthnathawk ngaihsaktu an duh thu te leh by-pass road chhiat dan media-ten a hmunah min enfiahsak an duh thute an keng a ni.
Punkhawmnaah hian an hruaitu zing a mi Lalthlengliana chuan Assam Rifles-in an huan panna kawng paltlang an phal lohna hi tun hmaa an pi leh pute atanga an zawh ber a nih thu a sawi a. Assam Rifles an awm dawn avanga sorkarin kal kawng sial sak ve mah se, mihring tan pawha kawng zawh harsa khawpa chhia a nih avangin an kal pawh a harsat thu a sawi.
Khuangkhua Lui Zau Association President G Ramchangliana pawhin, Assam Rifles-in an hmun paltlang an phal loh avangin an mangang takzet tawh tih a sawi a. Tun tumah hian politics engmah a inrawlh loh thu a sawi a. Tuna kawng laih chah an tum pawh hi kawng hi chhia se an tihna ngawr ngawr a nih loh thu sawiin, “He lai kawng hi Assam Rifles chauh pawh ni lo, kuthnathawktute chakkhai lamna ve tho a ni. Kawng chhe vek rawh se kan tihna a ni lo. Mahse, Assam Rifles ram paltlang leh theih a ni emaw, vantlang kawng tha zawk min siamsak a nih hma loh chuan kan theih dan danin theihtawp chhuahin hma kan la a ni,” a ti.
Commissioner & Secretary, Home Department kaihhruaina hnuaiah Assam Rifles hotute leh Zokhawsanga huan lo ram neitute intelkhawm pawl hruaitute inbiain By Pass Road siamthat a nih hma chuan lo neituten Assam Rifles, Bn. Hqrs, Zokhawsang kal tlangin chawlhkar khatah ni li – Thawhtanni, Thawhlehni, Ningani leh Zirtawpniah te lirthei nen zing dar 4 atanga zan dar 6 inkarah an kaltlang thei dawn a. Nilaini leh Inrinniah te hian lirtheia kaltlang a rem dawn lo thung. Ke erawh chuan engtik niah pawh kaltlang theih a nih tur thu relin an inrem a. Hei hi Col. Mukesh Shukla, Co, 2 AR pawmpuina an tifel nghal bawk.
An inremna hi venhimna thil leh tul bik thilah Assam Rifles-te leh Home Department ten an ennawn thin ang a. By Pass road hi a rang thei ang bera siam that a nih theih nan MPWD chu hma la nghal tura tih a ni bawk.