China chhimchhak, Guangdong province-a kindergarten-ah mi paruk vih hlum an ni a, an zinga pathum hi naupang an ni.
Police chuan mipa kum 25 mi an man thu leh Lianjiang-a mi niin Wu tih hming pu a nih thu an sawi.
Thi ve dang hi zirtirtu leh nu leh pa pahnih an ni tih thuneitute chuan an sawi niin AFP chuan a tar lang a. Mi pakhatin hliam a tuar bawk.
Police chuan a chhan tak an la hre lo va, an chhui zui nghal mek tih an sawi.
He inbeihna hi Thawhtanni zing dar 7:40 (India-a zing dar 6:10) vela thleng niin nu leh paten nipui sikul tana an fate an thlah zo hlim deuh chauh a ni a. A titua an puh hi zing dar 8:00 velah an man a ni.
Kindergarten bula dawr nei pakhat chuan a bul vel zawng zawng tlawh theih lohva tih nghal vek a nih thu a sawi.
Lianjiang hi mihring maktaduai 1.87 vel chenna a ni.
Chinese social media-ah chuan he thil thleng hi nasa taka thehdarh niin mi mak tih leh thinrim an tam hle.
China-ah hian silai khap a ni a, tuna inbeihna ang chi erawh a thleng fo va. Chemical spray hmanga classroom beihna ang chi pawh a lo thleng tawh thin.
BBC chuan kum 2010 atang khan China-a sikul, college leh university-ah chema inbeihna hi vawi 17 vel a thleng tawh niin a sawi a. Heng zinga 10 hi kum 2018 leh 2023 inkara mi a ni nghe nghe.
Nikum August khan chem kengin chhimchhak, Jiangxi province-a kindergarten a luhchilh a, mi pathum thatin parukin hliam an tuar.
April, 2021 khan Guangxi Zhuang autonomous region-a Beiliu City-ah naupang pahnih vih hlum an ni a, mi dang 16-in hliam an tuar bawk.
October, 2018 khan chhimthlang lam, Chongqing-ah kindrgarten tho beih niin naupang 14 vih hliam an ni.
Heng thil thlengah hian a titu hi a tlangpuiin mipa, khawtlang kal dana lawm lova thinrim an ni thin a. Hetianga thinrimna tilanga chetna hi ram dangah pawh a thleng nasa a, US leh hmun dang tam takah chuan silai nena chet chhuah an ching a. Hetih rual hian mi thiamte chuan China-a chema mi beih tam lutuk hi a chhan dang a awm theih an ring.
Covid-19 hripuiah khan Chinese khawpuite chu rei tak, khauh tak bawkin kharkhip an ni a, hei hi a chhan lian tak ni theiin an ngai a. A hnu lam zela a nghawng theih hi zir chianna la awm lo mah se thinrimna leh lungawi lohna te, hna chân phah te, investment lama chet chhiat phah leh inngaihzawnna leh nupa inkara harsatna thlengin a thlen ni ngeia ngaih a ni thung.