Thawhtanni khan United States President Joe Biden-a sorkar chuan India chu Indo-Pacific chhehvela an thawhpuite zingah a pawimawh zual bik tih sawiin, khawvela ram chak zualte zinga India a inhlangkai chho thei leh internet khawvela India-in thil a enfiah reng thei chu lawmawm an tih thu an tar lang.
US State Department thupuangtu, Ned Price chuan chanchinbumite hmaah Secretary of State Tony Blinken leh India External Affairs Minister S Jaishankar te chu kar hnih chhunga a tum hnihna atan an inbiak thu a sawi.
Inbiaknaah hian hruaitu pahnihte hian US leh India inlaichinna tihchak lehzualna turte leh an ngaihtuah zawng inang awmte sawihoin Myanmar ram boruak pawh an sawi tel a ni.
Blinken-a hian Myanmar-a sipai thuneihna sang lutuk leh mipui rorelna sorkar a pawimawhzia a tar lang tel bawk.
Indo-Pacific tuipuia US leh India thawhho dan turte pawh sawihoin, “Ram pahnihte hian an thawhhona zauh zel an duh a, Quad atanga COVID do dan turte leh sik leh sa inthlak buaipui dan turte an sawi,” tiin Price hian mipui hmaah a tarlang a ni.
Price hian US chu India tana sumdawnna kawnga tangkai ber leh lian ber a nih thu sawiin tunah hian ram pahnih inkara sumdawnna hlut zawng hi US dollar tluklehdingawn 146 a tling phak.