A vawikhatna atan Max Verstappen-a’n hnehna a la chan ngai lohna hmunah a chang. British Grand Prix-ah pawh kumin a Formula One inelna thununtu in pakhatna a hauh.
Pathianni zanah Silverstone Circuit-ah tun season a Formula 1 intlansiak vawi 10-na neih a ni. World champion ni lai Dutch driver Verstappen hian kumin a vawi riat nan dawhsan sang ber a luah a. A zawnin vawi ruk pakhatna a luahna a ni bawk.
World championship-ah amah hnaih bertu a teammate lakah point 99 in hma a hruai mek a. Tu tan pawh pawhthlak a huphurhawm tawh.
Tun season intlansiak hmabak 12 la awmah pakhatna ni lovin pahnihna hauh vek mahse lehpelh theih a ni tawh dawn lo.
“A zawna vawi 11 chak hi team tan chuan thil ropui tak a ni. Helaiah hnehna kan chang leh thei hi ka lawm viau. Vawiin pawh a lan ang aiin a awlsam lo. A tirah bul ka tan chhia a, Oscar leh Lando te car kha a tlanchak thei em em bawk. Kha vang khan ka fimkhur a ngai hle.” tiin Verstappen chuan a chak hnuah a sawi.
McLaren upgrade a tha
British team McLaren in round hmasa zawk Austria-ah nen an car tihhmasawnna turin ‘upgrade’ awmze nei thui tham vawi hnih an hmang a, hei hian an intlansiakah nghawng a nei thui.
Qualifying-ah an driver Lando Norris leh Oscar Piastri te chu pahnihna leh pathumna an ni a, a hmalam atangin bul an tan.
Intlansiak tan veleh Verstappen aiin Norris a tlan chhuak tha zawk. Pahnihna atang hma hruai nghalin Piastri nen an inkarah Verstappen a awm. British mipui mi 160,000 te British tlangval vangin an thawm a ring.
McLaren car in Red Bull car tlanchak zawng chu a tluk ve viau. Nimahsela kumin a car tha ber Red Bull car hian drag reduction system atangin midangin 12kph vel an hmuh belh laiin 18kph chuang a neih belh thei bik. Hei hi F1 khawvelah chuan inthlau tak a ni.
A tir lap hnih chhung DRS hman theih a ni lova, lap thumna atang hman an phal hnuah Verstappen-a’n a nghah rei a ngai lo. Lap 5-naah hma hruaiin nidang ang thovin a tawp thlengin hnaih tak tak theitu an awm lo.
Red Bull hian round dawt leh Hungary a neih turah hian hnehna an chan leh chuan nikum Abu Dhabi Grand Prix atang pakhatna an la hauh vek avangin McLaren record chelhlai an khum thei ang.
Norris leh Piastri ten dawhsanah Verstappen an zui mai dawn nia a lanlaiin lap 33-na a Kevin Magnussen-a Haas car lakchhuah ngaiin intlansiak a nghawng.
Safety car tirhchhuah a nih laia Lewis Hamilton-a’n car ke thar a vuah hman chu vanneihpui in pathumna a hauh a. Tunhnaia Mercedes in an car an tihhmasawn theih rah chu hmuh theihin George Russell chu pangana a ni ve bawk.
Midangte dinhmun
Formula 1 a intlansiak upa ber British Grand Prix-ah tun tumah intlansiak tluang pangngai tak a thleng dawn nia a lan laiin Haas car lakchhuah ngai avanga safety car tirhin awmzia a nei thui.
Ferrari car ten palina leh pangana atangin bul tan mahse intlansiakni ah an car a tlanchak tawk lova, ‘race pace’ ah an car in midang a el tak tak thei lo. Pakuana leh 10-na an ni pha tawk.
Kawng ngil a car tlanchak thei tak nei Williams team a Thai-British Alexander Albon pawh safety car hunlai tuartu zingah a tel.
Safety car pangngai kalpui hma virtual safety car zawk kalpui laiin car ke a thlak a, safety car pangngai kalpui a nih leh si hnuah team dangte che ve lehin a dinhmun tha a hloh a. Pariatna a nih phah.