ZPM Thalai hruaitute’n Govt Mizoram Law College sak mek chu MNF sorkarna a tawp hma ngeia tha taka sa zo turin MNF sorkar an phut.
Nimin khan Aizawl Press Club-ah thu thar thehdarhtute an kawmah ZPM Thalai Vice President Zoramchhana Sailo chuan, Govt Mizoram Law College sak hna thawh mek chu February 28, 2023-a an enfiah hnuah July 10, 2023 khan an enfiah leh tih sawiin, “Hemi tum hian a sakna atana hmanraw hman leh a sak danah a lungawi thlak loh hle a, tun thlengin mipuite leh zirlaite tana han lawmna tur thil danglam hmuh tur a la awm chuang lo,” a ti.
Zoramchhana Sailo chuan Govt Mizoram Law College sak mek hi May 4, 2020 atanga chhiar tana thla 20 chhunga sak zawh tur a ni laiin, tun thlenga hna chanve takngial pawh zawk a la ni lo te, a sakna atana sum ruahman cheng Rs nuai 117.96 tehmeuh mai a sa tute hnenah pek chhuah a ni tawh si laia, engineer-in a vil mumal lote chu thil fel lo tak a nih thu a sawi.
Govt Mizoram Law College sak hna thawk mekah thil rinhlelhawm tak inphumru a awm ngeia a rin thu sawiin Zoramchhana Sailo chuan, a satu Sky Ridge Construction & Consultancy Services hian RUSA 2.0, component 9: Infrastructure Grants to College hnuaia hna 35 awmah hna 15 zet restricted tender hmanga thawh a nih thu a sawi a. Sky Ridge Construction & Consultancy Services phenah hian a changtu Minister Dr. R. Lalthangliana hian man tang a ei ve em ni, tih chu an zawhna a nih thu leh, a department chanpual hnuaia hna chhe lutukte hi sawifiah thuai turin a changtu minister, Dr. R. Lalthangliana an phut thu a sawi bawk.
Zirna in sak chungchanga hetiang thil a thleng hi an ngai thu tak hle tih sawiin ZPM Thalai vice president chuan, “Zirna pawngsualnaah kan ngai a, zirna in leh a kaihhnawih sakte chu uluk takin a chhui zui zel dawn a, thil fel lo a awm chuan a mawhphurtuten hremna na tak an dawn theihna turin na takin hma a la zel dawn a ni,” tia sawiin, Govt. Mizoram Law College sak mek hi MNF sorkarna a tawp hma ngeia tha taka sa zo ngei turin MNF sorkar an phut tih a sawi bawk.